वृत्तसंस्था, नवी दिल्ली
आदर्श आचारसंहितेसंदर्भात व्यक्त झालेले मतभेद तसेच विरोधी सूर मांडणारा गट यांनी व्यक्त केलेली मते सार्वजनिक केली जाणार नाहीत, असे केंद्रीय निवडणूक आयोगाने आपल्या एका निवेदनात स्पष्ट केले आहे. आदर्श आचारसंहितेसंदर्भातील मतभेद सार्वजनिक करावेत, अशी मागणी निवडणूक आयुक्त अशोक लवासा यांनी केली होती. ही मागणी आयोगाच्या उर्वरित सदस्यांनी फेटाळून लावली.
आदर्श आचारसंहितेसंदर्भात आयोगाची मंगळवारी बैठक झाली. यावेळी आयोगाच्या प्रत्येक सदस्याचे मत नोंदवले जावे यावर शिक्कामोर्तब झाले. तसेच आयोगाच्या प्रत्येक बैठकीचे अतिवृत्त नोंदवले जावे, असेही ठरले. याविषयी औपचारिक सूचना लवकरच जारी करण्यात येणार आहेत. या बैठकीला केंद्रीय निवडणूक आयुक्त सुनील अरोरा, आयुक्त सुशील चंद्रा यांच्यासह अन्य सर्व आयुक्त उपस्थित होते.
बैठकीदरम्यान, आदर्श आचारसंहितेबाबत आयोग जारी करणार असलेल्या आदेशामध्ये आपण नोंदवलेले मतभेद समाविष्ट करण्यात आलेले नाहीत, असे सांगत अशोक लवासा यांनी आचारसंहिता भंग प्रकरणांपासून स्वतःला लांब ठेवले. पंतप्रधान नरेंद्र मोदी आणि भाजपाध्यक्ष अमित शहा यांनी आचारसंहितेचा भंग केल्याच्या तक्रारी आयोगाकडे आल्यानंतर आयोगाने या दोघांना क्लिन चिट दिली होती. त्याविरोधात लवासा यांनी आक्षेप नोंदवले होते.
निवडणूक आचारसंहिताभंग प्रकरणे ही अर्ध न्यायिक नसल्यामुळे त्यावर निवडणूक आयोग व आयोग सदस्यांच्या स्वक्षऱ्या नाहीत. त्यामुळे या प्रकरणांत व्यक्त झालेले मतभेद हे आदेशाचा भाग ठरू शकत नाहीत, असे आयोगाने स्पष्ट केले.