‘सीबीआय’चे माजी प्रमुख आरोपांच्या फेऱ्यात

नवी दिल्ली : अंमलबजावणी संचलनालयाकडून तक्रार आल्यानंतरही, मांस निर्यातदार मोईन कुरेशीविरोधात कारवाई न केल्याबद्दल ‘सीबीआय’चे माजी प्रमुख ए. पी. सिंह यांच्याविरोधात फिर्याद नोंदविण्यात आलेली आहे.

मात्र, मोईन कुरेशीबरोबर फोनवरून झालेल्या चर्चेच्या आधारावर ही फिर्याद नोंदविण्यात आली आहे. ही चर्चा खूपच वैयक्तिक व निरुपद्रवी असल्याचे ए. पी. सिंह यांनी म्हटले आहे. ए. पी. सिंह २०१२मध्ये निवृत्त झाले आहेत. ‘सीबीआय’कडूनच फिर्यादीमध्ये नाव नोंदविण्यात आलेले ए. पी. सिंह हे पहिलेच ‘सीबीआय’प्रमुख आहेत. ही फिर्याद गेल्या आठवड्यामध्ये नोंदविण्यात आली होती. मोईन कुरेशीवर बेहिशेबी मालमत्ता असल्याचा आरोप आहे. तर, कुरेशी आणि सिंह यांच्यातील एसएमएसच्या आधारे ही फिर्याद नोंदविण्यात आली आहे. एकूण २२ एसएमएसपैकी ३ एसएमएसच सिंह प्रमुख असल्याच्या काळातील आहेत, असे सांगण्यात येते. यातील एका संदेशामध्ये कौटुंबिक मित्रासाठी मदत मागितल्याचे म्हटले आहे.

सिंह यांच्या घराची सोमवारी झडती घेण्यात आली. या तीन वर्षांच्या काळामध्ये कोणाही व्यक्तीसाठी मदत मागितली नाही, असा खुलासा सिंह यांनी केला आहे. तसेच, वकिलांशी बोलूनच या कारवाईविषयी प्रतिक्रिया देणार असल्याचे सांगितले.