गुजरातेत मुस्लीम सोसायट्यांवर 'X'च्या खुणा

मटा ऑनलाइन वृत्त | अहमदाबाद

अहमदाबाद शहरातील पलदी परिसरातील मुस्लीम सोसायटी आणि हिंदू कॉलनीतील घरांवर लाल रंगाच्या 'X'च्या खुणा केल्याने येथील रहिवासी प्रचंड दहशतीखाली आहेत. याच परिसरात काही दिवसांपूर्वी 'मुस्लीम वस्ती तयार होत आहे' अशा आशयाचे वादग्रस्त पोस्टर लागले होते. त्यामुळे येथील वातावरण भीतीदायक आणि तणावपूर्ण आहे.

मुस्लीम परिसराची ओळख व्हावी, या हेतूने येथील घरांवर खुणा केल्या असाव्यात, अशी शंका रहिवाशांनी व्यक्त केली आहे. याबाबत त्यांनी निवडणूक आयोग आणि पोलीस आयुक्तांना पत्रही पाठवले आहे. परिसरातील शांतता भंग करण्याचा कट असावा, असेही त्यात म्हटले आहे. अमन कॉलनी, नशेमॅन अपार्टमेंट, टागोर फ्लॅट, आशियाना अपार्टमेंट, तक्षशिला कॉलनीबाहेरील प्रवेशद्वारांवरही अशा प्रकारच्या खुणा केल्या आहेत. अशा प्रकारांमुळे शांतता भंग होऊ नये यासाठी ठोस पावले उचलावीत, अशी विनंती निवडणूक आयोग आणि पोलीस आयुक्तांना केली आहे, असे परिसरातील रहिवासी आदिल बगादिया यांनी सांगितले.

तीन दिवसांपूर्वी याच परिसरात वादग्रस्त पोस्टर लावण्यात आले होते. पलदीचा जुहापुरा होण्यापासून वाचवा, असा उल्लेख त्यावर केला होता. जुहापुरा ही भारतातील सर्वात मोठी मुस्लीम वस्ती आहे. त्यामुळे पलदी सर्वात मोठी मुस्लीम वस्ती होत आहे, असा इशारा त्यातून देण्यात आला होता, असे काही रहिवाशांनी सांगितले. दरम्यान, ज्या परिसरातून कचरा उचलायचा आहे, अशी ठिकाणे लक्षात राहावी, यासाठी नगरपालिकेच्या स्वच्छता कर्मचाऱ्यांनी या खुणा केल्या, असेही सांगण्यात येत आहे. मात्र, अमन कॉलनीतील रहिवासी जुबेर अहमद यांना ही बाब मान्य नाही. पालिकेकडून अशी कोणतीही माहिती आम्हाला देण्यात आली नाही, असे ते म्हणाले. याबाबत पालिकेतील अधिकाऱ्यांच्या वेगवेगळ्या विधानांनी संभ्रम निर्माण केला आहे. स्वच्छता अभियानांतर्गत या खुणा केल्याचे आरोग्य अधिकारी नितीन प्रजापती यांनी सांगितले, तर पालिका कर्मचाऱ्यांनी केलेल्या खुणांपेक्षा या खुणा वेगळ्या आहेत, असे आयुक्त मुकेश कुमार यांनी सांगितले. दरम्यान, या खुणा आरोग्य विभागातील कर्मचाऱ्यांनी केल्या आहेत, असे पोलीस आयुक्त ए. के. सिंह यांनी सांगितले. या प्रकरणाच्या चौकशीचे आदेश दिले आहेत, अशी माहितीही त्यांनी दिली.