चीनच्या राजदूतांना आशा
वृत्तसंस्था, नवी दिल्ली
'जैश ए महंमद'चा म्होरक्या मसूद अझरला जागतिक दहशतवादी म्हणून जाहीर करण्याचा संयुक्त राष्ट्रांमधील मुद्दा लवकरच सुटेल, अशी आशा चीनच्या भारतातील राजदूतांनी व्यक्त केली आहे.
मसूद अझरला जागतिक दहशतवादी म्हणून जाहीर करण्यासाठी भारतासह अमेरिका, फ्रान्स आणि ब्रिटन यांनी चार वेळा प्रयत्न केले आहेत. मात्र, चीनने चारही वेळा त्याला खोडा घातला आहे. चीनने सुरक्षा परिषदेमध्ये नकाराधिकाराचा वापर केल्यामुळे, चारही प्रस्ताव बारगळले. पुलवामा हल्ल्यानंतर, अमेरिका, फ्रान्स आणि ब्रिटन यांनी आणलेल्या प्रस्तावावरही चीनने तांत्रिक कारण पुढे करत, नकाराधिकार वापरला. त्यामुळे, चीनविरोधात तीव्र नाराजी व्यक्त करण्यात आली आहे. या पार्श्वभूमीवर, चीनचे भारतातील राजदूत लुओ झाओहुई यांनी या मुद्द्यावर तोडगा निघेल, अशी आशा व्यक्त केली. भारताने नाराजी व्यक्त केली असली, तरीही दोन्ही देशांमधील भविष्यातील सहकार्यावर त्याचा परिणाम होणार नाही, असेही त्यांनी म्हटले आहे.
काश्मीरसाठी मसूद ब्रिटनमध्ये गेला होता
नवी दिल्ली : जम्मू-काश्मीरमध्ये कारवाया करणाऱ्या दहशतवाद्यांना मदत मिळविण्यासाठी 'जैश ए महंमद'चा म्होरक्या मसूद अझर १९९२मध्ये ब्रिटनमध्ये फिरला होता. त्याला १५ लाख पाकिस्तानी रुपयांची मदत मिळाली होती आणि त्यानंतर १९९४मध्ये तो शारजाह आणि सौदी अरेबियामध्येही गेला होता. मसूद अझरला अटक केल्यानंतर केलेल्या चौकशीमध्ये ही माहिती समोर आली होती. त्याच्याकडे १९८६मध्ये खऱ्या नावाचा आणि पत्त्याचा पासपोर्ट होता आणि त्यावरून तो आफ्रिका व आखाती देशांमध्ये फिरला होता, असेही समोर आले आहे.
पाकिस्तानचे पत्र
'जमात उद दावा'चा म्होरक्या हाफिज सईदचे नाव जागतिक दहशतवाद्यांच्या यादीतून काढून टाकण्याच्या निर्णयाची माहिती भारतीय वृत्तसंस्था 'पीटीआय'ला कशी मिळाली, याची चौकशी करण्याची मागणी पाकिस्तानकडून करण्यात आली आहे. सुरक्षा परिषदेतील १५ सदस्यांपैकी कोणत्या सदस्याने ही माहिती या वृत्तसंस्थेला दिली, यासाठी चौकशी करण्यात यावी, अशी मागणी पाकिस्तानच्या संयुक्त राष्ट्रांमधील राजदूत मलीहा लोधी यांनी केली आहे. संयुक्त राष्ट्रांमधील एखाद्या घडामोडीच्या वार्तांकनाविषयी प्रथमच अशा पद्धतीने चौकशीची मागणी करण्यात आली आहे.