पर्रीकरांवर दबाव नको

पणजी : 'गोव्याचे मुख्यमंत्री मनोहर पर्रिकर यांनी दबाव झुगारून आणि कोणतेही नाटक, तमाशा न करता आजारातून बाहेर पडावे,' असा सल्ला नॅशनल कॉन्फरन्सचे नेते माजी मुख्यमंत्री उमर अब्दुला यांनी दिला आहे. अनेक दिवसांपासून स्वादुपिंडाच्या कर्करोगाने त्रस्त असलेल्या मनोहर पर्रिकर यांनी रविवारी आपल्या बाहेर पडून मांडवी नदीवर बांधण्यात येत असलेल्या पुलाची पाहणी केली. त्यांच्या सोबत प्रशासनातील अधिकारी आणि बाधकाम करणाऱ्या लार्सन अॅण्ड ट्रुर्बो कंपनीचे इंजिनीअर उपस्थित होते. फोटोत त्यांच्या नाकाला लावलेल्या उपचाराच्या नळ्याही दिसत होत्या. घटनेचे फोटो सोशल मीडियावर व्हायरल झाले होते. त्या फोटोंबाबत अब्दुला यांनी टिट्वटरवर प्रतिक्रिया व्यक्त केली.

'त्यांची प्रकृती चांगली नसताना पर्रिकरांवर आपले काम पुन्हा सुरू करण्याचा दबाव टाकणे आणि तो फोटो सोशल मीडियावर प्रसिद्ध करणे हे अमानवीय आहे. असा दबाव आणि तमाशा न करता त्यांना आजारातून बाहेर पडू दिले जाणार नाही का?' असा सवालही अब्दुला यांनी उपस्थित केला आहे.