अबब!, भिकाऱ्याकडे कोट्यवधींची संपत्ती

मटा ऑनलाइन वृत्त । पाटणा

सव्वा कोटींची संपत्ती, २ हजार चौरस फुटांचा प्लॉट...चार बँक खात्यांमध्ये ५ लाख रुपये...आता तुम्हाला वाटेल की, कुणा धनिकाविषयी वाचत आहात. पण थोडं थांबा...! ही कोट्यवधींची संपत्ती एका भिकाऱ्याकडे आहे. बसला ना धक्का..!

पप्पू कुमार असं या सुशिक्षित भिकाऱ्याचं नाव आहे. तो पाटणा येथे राहतो. त्याची बँकेत एक-दोन नव्हे तर तब्बल चार खाती आहेत. त्यात पाच लाख रुपये आहेत. रेल्वे सुरक्षा दलानं पाटणा रेल्वे स्थानकातील भिकाऱ्यांवर कारवाईची मोहीम हाती घेतली आहे. या कारवाईदरम्यान हा 'श्रीमंत' भिकारी सापडला. आता एका भिकाऱ्याकडे इतकी संपत्ती आहे, असं समजल्यानंतर डोळे पांढरेफटक पडणारच ना! पप्पू कुमार हा इंजिनीअरिंग कॉलेजमध्ये शिक्षण घेत होता. पण एका अपघातात अपंगत्व आल्यावर त्याने भीक मागणे सुरू केले. कोट्यवधींचा मालक असलेल्या पप्पूने येथील न्यू मार्केट परिसरातील काही व्यापाऱ्यांना लाखोंचे कर्जही दिले आहे.

एका पायाने आणि हाताने अधू असलेल्या पप्पूला एका पोलीस अधिकाऱ्याने शस्त्रक्रिया करण्याचा सल्ला दिला. पण त्याने तो धुडकावला. मी बरा झालो तर, भीक कसा मागणार. भीक मागूनच पैसे कमवायचे आहेत, असं उत्तर पप्पूने त्या पोलीस अधिकाऱ्याला दिले.