पिकनिक, प्री वेडिंग फोटोशूट, बर्थडे साजरा करायला स्मशानात होतेय गर्दी; कारण काय?

गांधीनगर: स्मशान शब्द ऐकताच डोळ्यांसमोर एक चित्र उभं राहतं. जळणारं पार्थिव, शोकाकुल कुटुंब, दु:खात बुडालेले नातेवाईक असं चित्र डोळ्यासमोर येतं. आपल्याला कधीच स्मशानात जाण्याची वेळ येऊ नये असं सगळ्यांना वाटतं. कारण स्मशान ही काही हवीहवीशी वाटणारी जागी नाही. मात्र गुजरातच्या बनासकांठा जिल्ह्यात एका स्मशानात कायम गर्दी पाहायला मिळते. अनेक जण इथे फिरायला येतात. इतकंच काय तर इथे प्री वेडिंग शूटसाठी अनेकजण येतात.

बनासकांठाच्या डिसामध्ये असलेल्या स्मशानाचं सौंदर्यीकरण करण्यात आलं आहे. बनास नदीच्या काठावर ९ एकर जमिनीवर ७ कोटी रुपये खर्चून स्मशानाची उभारणी करण्यात आली आहे. या ठिकाणी आसपासचे लोक अंत्यविधींसाठी तर येतातच. याशिवाय वाढदिवस साजरा करण्यासाठी, प्री वेडिंग फोटोशूटसाठीदेखील या ठिकाणी गर्दी होते. स्मशानभूमीचं ८० टक्के काम पूर्ण झालं. त्यासाठी ५ कोटी रुपये खर्च करण्यात आले आहेत.
VIDEO: बस आज की रात है जिंदगी! गाण्यावर तुफान नाच; सरकारी अधिकारी कोसळला, तो उठलाच नाही
डिसा आणि आसपासच्या परिसरात राहणाऱ्यांसाठी स्मशानभूमी आकर्षणाचा केंद्रबिंदू ठरत आहे. या ठिकाणी अंत्यविधी तर होतातच. यासोबतच इथे पिकनिक पॉईंट आणि प्री वेडिंग शूटिंग पॉईंटदेखील तयार करण्यात आले आहेत. अनेकांना स्मशानात जावंसं वाटत नाही. तिकडे जायला अनेकांना भीती वाटते. मात्र डिसामधील स्मशानभूमीत लोक फिरायला जातात. स्मशानचं प्रवेशद्वार रिसॉर्टच्या प्रवेशद्वारासारखं तयार करण्यात आलं आहे. मुलांच्या अंत्यसंस्कारांसाठी वेगळी जागा देण्यात आली आहे.
लग्नाच्या १० दिवसांनंतर नवरा-नवरीचं अपहरण; दिवसाढवळ्या घरातून पळवलं; कारण समोर
स्मशानात प्रार्थना कक्ष, ग्रंथालय, उद्यान, मुलांसाठी खेळण्याची सोय आहे. ग्रामीण संस्कृतीबद्दल माहिती देणारी पेंटिंग्स रेखाटण्यात आली आहेत. स्मशानात स्नानगृह, शौचालय, जुनी विहीर, पावसाचं पाणी साठवण्याची व्यवस्था आहे. स्मशानाची विभागणी प्रामुख्यानं दोन भागांत करण्यात आली आहे. एका ठिकाणी केवळ अंत्यसंस्कार केले जातात. तर दुसऱ्या भागात लोक फिरायला येतात. हा भाग अतिशय सुंदर आहे. त्यामुळे अनेक जण इथे प्री वेडिंग फोटोशूटसाठी येतात.

आतापर्यंत ५ कोटी रुपये स्मशानावर खर्च करण्यात आले आहेत. त्यातून ८० टक्के काम पूर्ण झालं आहे. विशेष म्हणजे इथे केवळ १ रुपयात अंत्यविधी केले जातात. सर्वसाधारणपणे अंत्यसंस्कारासाठी ३ ते ४ हजारांचा खर्च येतो. मात्र या स्मशानात कोणीही गरीब व्यक्ती सहजपणे त्याच्या नातेवाईकावर अंत्यविधी करू शकते.