दहशतवाद्यांचं समर्थन करणारेच शाहीन बागेत: योगी

नवी दिल्ली: काश्मीरमध्ये दहशतवाद्यांचं जे लोक समर्थन करत आहेत, तेच लोक शाहीन बागेत निदर्शने करत असून आझादीच्या घोषणा देत आहेत, असा दावा उत्तर प्रदेशचे मुख्यमंत्री योगी आदित्यनाथ यांनी केला. दिल्लीतील अरविंद केजरीवाल सरकारकडून शाहीन बागमधील आंदोलकांना बिर्याणी वाटप केली जात असल्याचा आरोपही त्यांनी केला.

दिल्ली विधानसभा निवडणुकीच्या पार्श्वभूमीवर रोहिणी येथे आयोजित करण्यात आलेल्या जनसभेला संबोधित करताना योगी आदित्यनाथ यांनी हा दावा केला. शाहीन बागमध्ये नागरिकत्व दुरुस्ती कायद्याविरोधात जोरदार आंदोलन सुरू आहे. यापार्श्वभूमीवर या आंदोलनाच्या हेतूवरच योगी आदित्यनाथ यांनी शंका उपस्थित केली. त्यांच्या (आंदोलकांच्या) पूर्वजांनी देशाची फाळणी केली. त्यामुळे नव्या दमाच्या एक भारत, श्रेष्ठ भारताची अडचण वाटत आहे, अशी टीका आदित्यनाथ यांनी केली. सीएएच्या विरोधात दिल्लीच्या विविध भागात आंदोलन होत नसून जागतिक स्तरावर भारत एक महाशक्ती नावारुपाला येत असल्याने या लोकांची पोटदुखी वाढली आहे. त्यामुळेच हे लोक सीएएच्या नावाखाली आंदोलन करत आहेत, असा आरोपही त्यांनी केला. यावेळी त्यांनी शाहीन बागेतील आंदोलनावर अविश्वास व्यक्त करण्यासाठीच भाजपला मतदान करण्याचं आवाहनही आदित्यनाथ यांनी दिल्लीकरांना केलं.

शाहीन बागमध्ये गोळीबार; हल्लेखोराला अटक

CAA: नागपाड्यातील महिलांचे आंदोलन मागे

दरम्यान, शाहीन बाग येथे नागरिकत्व कायद्याविरुद्ध बेमुदत आंदोलन सुरू असून आज तिथेही गोळीबाराची घटना घडल्याने खळबळ उडाली आहे. जिथे निदर्शने सुरू आहेत तिथून काही अंतरावरच आजची गोळीबाराची घटना घडली. हल्लेखोराने तीन गोळ्या हवेत झाडल्या. हा इसम नोएडा भागातून आला होता. त्याला अटक करण्यात आली आहे. दरम्यान, आज झालेल्या गोळीबारात सुदैवाने कुणीही जखमी झालेले नाही.


दिल्लीत जामिया विद्यापीठात गोळीबार