दगडफेकीवर हवेत सुनियोजित उपाय : बिपीन रावत

वृत्तसंस्था, श्रीनगर

काश्मीर खोऱ्यात दहशतवादविरोधी मोहीम राबवताना नागरिकांकडून केल्या जाणाऱ्या दगडफेकीचा परिणामकारक सामना करण्यासाठी सुरक्षादलांनी सुनियोजित प्रयत्न करण्याची गरज आहे, अशी भूमिका लष्करप्रमुख बिपीन रावत यांनी मांडली आहे.

लष्कराच्या ‘किलो फोर्स’ आणि ‘व्हिक्टर फोर्स’ या दहशतवादविरोधी युनिट‍्सच्या मुख्यालयात शुक्रवारी लष्कराच्या स्थानिक अधिकाऱ्यांची बैठक झाली. या बैठकीत रावत यांनी ही भूमिका मांडली. दहशतवादविरोधी मोहिमेत सर्वोच्च पातळीवर दक्षता घेण्याची गरज असल्याचे मत व्यक्त करून, रावत यांनी सुरक्षेशी संबंधित अन्य संस्थांबरोबर सर्व ते प्रयत्न केले पाहिजेत, असे म्हटले आहे.

काश्मीर खोऱ्यातील सध्याची सुरक्षाविषयक स्थिती आणि हाती घेण्यात आलेल्या मोहिमांची रावत यांना या वेळी माहिती देण्यात आली. रावत यांनी या वेळी स्थानिक कमांडर आणि जवानांशी संवाद साधला.

पाकशी चर्चा करा : अब्दुल्ला

‘बुलेट फॉर बुलेट’ धोरणाने जम्मू-काश्मीरमधील परिस्थिती अधिकच चिघळेल. त्यामुळे राज्यात शांतता प्रस्थापित करण्यासाठी पाकिस्तानशी संवाद सुरू करण्याची गरज आहे,’ असे मत नॅशनल कॉन्फरन्सचे अध्यक्ष फारूख अब्दुल्ला यांनी व्यक्त केले.