लोकसभेत महागाईवर चर्चा अन् सरकारला धारेवर धरणाऱ्या खासदार बॅग लपवू लागल्या; नेमकं काय घडलं?

नवी दिल्ली: लोकसभेच्या पावसाळी अधिवेशनात महागाईचा मुद्दा गाजत आहे. काल सदनात महागाईवर जोरदार चर्चा झाली. विरोधकांनी सरकारला धारेवर धरलं. या दरम्यान तृणमूल काँग्रेसच्या खासदार महुआ मोईत्रा त्यांची लुई वुईटन बॅग लपवताना दिसल्या. तृणमूल पक्षाच्याच काकोली घोष दस्तीगार महागाईवर बोलत असताना त्यांच्या शेजारी बसलेल्या मोईत्रा आपली बॅग बाकांच्या खाली स्वत:च्या पायांजवळ ठेवताना दिसल्या.

महुआ मोईत्रा यांच्याकडे असलेल्या लुई वुईटन बॅगेची किंमत दीड लाख रुपयांच्या घरात आहे. मोईत्रा बॅग लपवत असताना कॅमेऱ्यात कैद झाल्या. त्यांचा व्हिडीओ सोशल मीडियावर व्हायरल झाला. महागाईवरून सरकारला जाब विचारणाऱ्या तृणमूलच्या खासदार इतकी महागडी बॅग कशी काय वापरतात, असा सवाल नेटकरी विचारत आहेत.
दोन हजारांच्या नोटेबद्दल मोदी सरकारकडून धोक्याचा इशारा; जाणून घ्या कारण
पावसाळी अधिवेशनात महागाईचा मुद्दा गाजत आहे. विरोधक सातत्यानं सरकारवर निशाणा साधत आहेत. व्हायरल व्हिडीओमध्ये तृणमूल काँग्रेसच्या काकोली बोलायला उभ्या राहिलेल्या दिसतात. त्यावेळी त्यांच्या बाजूला बसलेल्या महुआ मोईत्रा स्वत:ची लुई वुईटन बॅग उचलतात आणि ती पायाजवळ ठेवून देतात.

महुई मोईत्रा यांचा व्हिडीओ सोशल मीडियावर वेगानं व्हायरल झाला. महागाईवरून सरकारला घेरणाऱ्या खासदार संसदेत इतकी महागडी हँडबॅग कशी आणतात, असा प्रश्न नेटकरी विचारत आहेत. फॅशन ब्लॉग आणि संकेतस्थळांवरील माहितीनुसार, मोईत्रा यांची हँडबॅग जवळपास १.६ लाख रुपयांची आहे.