वृत्तसंस्था, नवी दिल्ली
'यूपीए'च्या अध्यक्षा सोनिया गांधी यांचे निकटवर्तीय आणि काँग्रेसचे प्रवक्ते टॉम वडक्कन यांनी गुरुवारी भारतीय जनता पक्षात प्रवेश केला. बालाकोट येथे भारतीय हवाई दलाने केलेल्या हल्ल्याप्रकरणी काँग्रेसची भूमिका न पटल्याने भाजपमध्ये प्रवेश करीत असल्याचे त्यांनी सांगितले. केंद्रीय मंत्री रविशंकर प्रसाद यांच्या उपस्थितीत ते भाजप परिवारात दाखल झाले. त्यानंतर वडक्कन यांनी भाजपचे राष्ट्रीय अध्यक्ष अमित शहा यांची भेट घेतली.
वडक्कन पत्रकारांशी बोलताना म्हणाले, 'काँग्रेस पक्ष सोडावा लागत आहे याचे नक्कीच दु:ख आहे. मात्र, पुलवामा हल्ल्यानंतर भारताने घेतलेल्या बदल्याबद्दल काँग्रेसने घेतलेली भूमिका राष्ट्रहिताविरोधात आहे. त्यामुळे पक्ष सोडण्यावाचून माझ्याकडे दुसरा कोणताही पर्याय नव्हता. दोन दशकांपेक्षा जास्त काळ मी माझे आयुष्य काँग्रेससाठी खर्च केले. स्वत:ला पक्षासाठी झोकून दिले. मात्र, सध्याची पक्षाची भूमिका वापरा आणि फेकून द्या अशी आहे. पंतप्रधान नरेंद्र मोदी यांची विकासाची भूमिका मला भावली आहे. त्यामुळेच मी भाजपमध्ये जाण्याचा निर्णय घेतला आहे.' भाजप वडक्कन यांना केरळमधून उमेदवारी देण्याची शक्यता आहे.
काँग्रेसची टीका
वडक्कन यांच्या भाजपप्रवेशावर काँग्रेसने त्यांच्यावर जोरदार टीका केली आहे. 'जी व्यक्ती एक पक्ष सोडते आणि दुसऱ्या पक्षात जाते, त्या व्यक्तीला नवीन पक्षात नक्कीच 'भवितव्य' असतेच. वडक्कन गेल्या काही दिवसांपर्यंत पंतप्रधान नरेंद्र मोदी यांच्यावर टीका करीत होते आणि आज त्याच मोदींच्या भाजपमध्ये ते दाखल झाले आहेत,' अशी टीका काँग्रेसचे प्रवक्ते रणदीप सुरजेवाला यांनी म्हटले आहे.
ओळ
केंद्रीय मंत्री रविशंकर प्रसाद आणि टॉम वडक्कन
तृणमूलचे अर्जुनसिंह भाजपमध्ये
पश्चिम बंगालमध्ये लोकसभेच्या २३ जागा जिंकण्याचे लक्ष्य ठेवणाऱ्या भाजपने तृणमूल काँग्रेसचे चार वेळा आमदार असलेले भाटपारा नगरपालिका अध्यक्ष अर्जुनसिंह यांना भाजपमध्ये खेचले आहे. अर्जुनसिंह बराकपूर लोकसभा मतदारसंघात तृणमूल काँग्रेसची उमेदवारी मागत होते. ही जागा दिनेश त्रिवेदी यांना दिल्यामुळे अर्जुनसिंह यांनी बंडखोरी करून भाजपमध्ये प्रवेश करण्याचा निर्णय घेतला. पश्चिम बंगालमध्ये भाजपच्या गोटात दाखल झालेले ते प्रभावी नेते मानले जातात. गैरबंगाली सिंह यांच्या प्रवेशामुळे भाटपारा नगरपालिकाही भाजपच्या ताब्यात आली आहे. ज्यूट उत्पादनासाठी प्रसिद्ध असलेल्या भाटपारा भागात बिहार, पूर्व उत्तर प्रदेशातील कामगारांचे प्राबल्य आहे.
मनीष खंडुरी काँग्रेसमध्ये जाणार
भाजपचे नेतेही काँग्रेसमध्ये प्रवेश करण्यास उत्सुक असून, उत्तराखंडचे माजी मुख्यमंत्री भुवनचंद्र खंडुरी यांचे पुत्र मनीष खंडुरी शनिवारी, १६ मार्च रोजी डेहराडून येथे होणाऱ्या राहुल गांधी यांच्या जाहीर सभेत प्रवेश करतील, असे सूत्रांचे म्हणणे आहे. मनीष खंडुरी यांची राहुल गांधींसोबत भेट झाली असून त्यांना पौडी गडवाल लोकसभा मतदारसंघातून निवडणूक लढायची इच्छा असल्याचे समजते. खंडुरींसोबत उत्तराखंडमधील भाजपचा आणखी एक नेता काँग्रेसमध्ये सामील होण्याची शक्यता व्यक्त करण्यात येत आहे.