सामान्य कैद्यासारखी वागणूक; लालू भडकले

रांची: चारा घोटाळ्याप्रकरणी साडेतीन वर्षाची शिक्षा झाल्यानंतर राष्ट्रीय जनता दलाचे सर्वेसर्वा लालू प्रसाद यादव यांची रांचीच्या बिरसा मुंडा तुरुंगात रवानगी करण्यात आली आहे. मात्र या तुरुंगात सामान्य कैद्यांसारखी वागणूक मिळत असल्याने लालू यादव भडकले असून त्यांनी त्याबाबतची तक्रार सीबीआयच्या विशेष न्यायालयाच्या न्यायाधीशांकडे केली आहे.

लालू प्रसाद यादव यांना बुधवारी दुमका आर्थिक गैरव्यवहार प्रकरणी सीबीआयच्या विशेष न्यायालयासमोर हजर करण्यात आले होते. साडेतीन वर्षाची शिक्षा झाल्यानंतरही त्यांच्यात काहीच बदल झालेला दिसत नव्हता. उलट सीबीआय न्यायालयाचे न्यायाधीश शिवपाल सिंह यांच्याशी ते हास्यविनोदात रमलेले दिसले. यावेळी न्यायाधीश शिवपाल सिंह यांनी तुरुंगातील तक्रारींबाबत त्यांना विचारलं, तेव्हा लालूंनी त्यांच्या खास शैलीत तक्रार केली. तुरुंग प्रशासन पक्ष कार्यकर्ते आणि इतर लोकांना भेटू देत नाही, अशी तक्रार त्यांनी केली. तेव्हा, 'नियमांचं पालन केल्यानंतरच कुणालाही तुम्हाला भेटता येईल. त्यासाठी तुम्हाला खुल्या तुरुंगात ठेवण्याची मी शिफारस केली होती,' असं शिवपाल सिंह म्हणाले.

त्यावर, 'कार्यकर्त्यांना खुल्या तुरुंगात थांबविण्यात आलं तर तिथे नरसंहार होईल. झारखंडच्या सर्व २० हजार पोलिसांना तिथे तैनात करावे लागेल,' असं लालू म्हणाले. तर 'तुम्ही चिंता करू नका, असं काहीच होणार नाही,' असं सांगत न्यायाधीशांनी लालूंना निरुत्तर केलं. त्यानंतर आपल्याला तुरुंगात सर्वसामान्य कैद्यासारखी वागणूक दिली जात असल्याची तक्रारही लालूंनी केली. त्यावर नियम सर्वांना समान आहेत, असं न्यायाधीशांनी स्पष्ट केलं.

मला अडीच वर्षांची शिक्षा द्या!

न्यायालयात प्रश्नांची सरबत्ती करणाऱ्या लालूंनी दुमका आर्थिक गैरव्यवहार प्रकरणी अडीच वर्षाची शिक्षा सुनावण्याची आणि ही शिक्षा लवकर सुनावण्याची मागणी केली. त्याला शिवपाल सिंह यांनी हरकत घेतली. 'अशा प्रकारचं वक्तव्य करू नका आणि अशा प्रकारच्या गोष्टी इथे होता कामा नयेत,' अशा शब्दात शिवपाल सिंह यांनी लालूंना झापले.