'तलाकच्या प्रथेविरुद्ध मुस्लिमांनीच पुढे यावं'

मटा ऑनलाइन वृत्त । नवी दिल्ली

तीन तलाकच्या अनिष्ट प्रथेचे राजकारण न करता या प्रथेविरुद्ध मुस्लिम समाजानेच पुढे येऊन मार्ग काढावा. त्यामुळे येणाऱ्या पिढ्यांना ताकदच मिळेल, असे आवाहन पंतप्रधान नरेंद्र मोदी यांनी आज केले.

१२ व्या शतकातील थोर समाजसुधारक गुरू बसव यांच्या जयंती समारंभाला संबोधित करताना नरेंद्र मोदी यांनी हे आवाहन केले. लोकच समाजातील परंपरा मोडीत काढून नवी व्यवस्था स्विकारतात. त्यामुळे मुस्लिम समाजातूनच लोक पुढे येतील आणि तीन तलाकच्या समस्येचा सामना करणाऱ्या महिलांसाठी मार्ग शोधतील, अशी आशा त्यांनी व्यक्त केली.

हिंदू समाजातील विधवांच्या विवाहाला विरोध करणारी प्रथा मोडीत काढणारे थोर समाजसुधारक राजा राममोहन राय यांचा उल्लेखही त्यांनी यावेळी केला. राजा राममोहन राय यांनी विधवांच्या विवाहाला विरोध करणारी प्रथा मोडीत काढण्याचा विचार जेंव्हा मांडला असेल तेंव्हा त्यांना प्रचंड विरोधाला आणि टीकेला सामोरे जावे लागले असेल. पण ते मागे हटले नाहीत. ते लढले आणि त्यांनी करून दाखवलं, असंही मोदी म्हणाले.

अनेक शतकापूर्वी महिलांना त्यांच्या अधिकारावर बोलण्याचा हक्क दिला होता. तीन तलाकच्या मुद्द्याचं राजकारण करता कामा नये. भारतातूनच प्रबुद्ध मुस्लिम पुढे येतील आणि या समस्येवर मार्ग काढतील, असे सांगतानाच या समस्येतून मार्ग काढलाच पाहिजे. तीन तलाकच्या संकटातून जाणाऱ्या मुस्लिम महिलांना त्यातून मुक्ती द्यायलाच हवी. मुस्लिमांनीच पाऊल उचलावे. त्यामुळे येणाऱ्या पिढीला त्यातून ताकद मिळेल, असे मोदी म्हणाले.

जाती व्यवस्था नको

भारतात स्पृश्य-अस्पृश्यता नको आणि जातीव्यवस्थाही नको. समाजातील भेदभावाच्या दरी मिटल्या पाहिजेत. त्यामुळेच लोकशाही मजबूत होईल. भेदभाव नसेल तरच सर्वांचा विकास होऊ शकतो, असेही ते म्हणाले.