ट्रम्प यांचा मोदींना अभिनंदनाचा फोन

मटा ऑनलाइन वृत्त । नवी दिल्ली

उत्तर प्रदेशसह पाच राज्यांतील निवडणुकांमध्ये भाजपनं मिळविलेल्या उल्लेखनीय यशाची दखल आंतरराष्ट्रीय पातळीवरही घेतली गेली आहे. या विजयाचे शिल्पकार ठरलेल्या पंतप्रधान नरेंद्र मोदी यांना खुद्द अमेरिकेचे राष्ट्राध्यक्ष डोनाल्ड ट्रम्प यांनी फोन करून त्यांचं अभिनंदन केलं आहे.

व्हाइट हाउसच्या प्रवक्त्या सीन स्पाइसर यांनी याबाबतची माहिती दिली. संभाषणाचा पूर्ण तपशील त्यांनी दिला नाही. मात्र, दोन्ही नेत्यांमध्ये अत्यंत मनमोकळी चर्चा झाल्याचं त्यांनी सांगितलं. ट्रम्प हे अमेरिकेच्या अध्यक्षपदी आल्यापासून त्यांनी मोदींना तिसऱ्यांदा फोन केला आहे. त्यामुळं त्यांच्यातील चर्चेबद्दल उत्सुकता आहे.

देशातील सर्वात मोठे राज्य असलेल्या उत्तर प्रदेशातील महाविजयानं पंतप्रधान मोदी हे भारतातील आजघडीचे सर्वात शक्तिशाली नेते असल्यावर शिक्कामोर्तब झालं आहे. मोदींच्या नेतृत्वाखाली भारत जागतिक राजकारणात मोठी भूमिका बजावू शकतो, याचा अंदाज अमेरिकेला आहे. त्या दृष्टीनंच ट्रम्प पावले टाकत आहेत. दोन्ही नेत्यांनी यापूर्वीही एकमेकांना भेटीचं आमंत्रण दिलं आहे. यूपीच्या निवडणुकीतील यशाच्या निमित्तानं ट्रम्प यांनी मोदींना केलेला फोन हा पुढील भेटींच्या व चर्चेच्या पूर्वतयारीचा भाग असल्याचं बोललं जात आहे.