गायक अभिजीतवर ट्विटरबंदी

मटा ऑनलाइन वृत्त । मुंबई

ट्विटरवर वादग्रस्त पोस्ट करून सतत वाद ओढवून घेणारा पार्श्वगायक अभिजीत भट्टाचार्य याचं अकाऊंट ट्विटरकडून बंद करण्यात आलं आहे. जवाहरलाल नेहरू विद्यापीठाच्या (जेएनयू) छात्रसंघातील महिला नेता तसेच इतर महिलांबद्दल सातत्यानं आक्षेपार्ह ट्विट केल्यानंच अभिजीतविरुद्ध ही कारवाई करण्यात आली आहे.

अभिनेते, खासदार परेश रावल यांनी दोन दिवसांपूर्वी लेखिका अरुंधती रॉय यांच्याबद्दल एक ट्विट केलं होतं. 'काश्मीरमध्ये दगडफेक करणाऱ्या तरुणांना जीपला बांधण्याऐवजी अरुंधती रॉयना जीपला बांधा,' असं रावल यांनी म्हटलं होतं. अभिजीतनं रावल यांच्या ट्विटला लगेचच रिट्विट करून दुजोरा दिला. इतकंच नव्हे, अरुंधती रॉय यांना गोळ्या घालायला हव्यात, असंही मत मांडलं. तो यावरच थांबला नाही. त्यानं जेएनयू छात्रसंघातील महिला नेता शेहला राशिद यांच्यावरही आक्षेपार्ह भाषेत टिप्पणी केली होती. त्यांच्या या कृतीमुळे ट्विटर युजर्सनी अभिजीतविरोधात नाराजी दर्शवत त्यांचे अकाऊंट रिपोर्ट केले तर रशीद यांनीही अभिजीत यांचे अकाऊंट बंद करण्याची मागणी केली. अखेर मंगळवारी ट्विटरने त्यांचे अकाऊंट सस्पेंड केले. मात्र ते काही काळापुरते की कायमचे बंद करण्यात आले आहे, हे अजून स्पष्ट झालेले नाही.

या प्रकरणावर प्रतिक्रिया व्यक्त करताना अभिजीत यांनी आपण कोणालाही घाबरत नसल्याचे स्पष्ट केले. तसेच देशातील जनताही माझ्यासोबत आहे, असा विश्वासही त्यांनी व्यक्त केला.