कॅपिटल एक्स्प्रेस रुळावरून घसरली; ३४ जखमी

मटा ऑनलाइन वृत्त । गुवाहाटी

पाटण्याहून गुवाहाटीकडं जाणाऱ्या कॅपिटल एक्स्प्रेसचे दोन डबे रुळावरून घसरल्यानं झालेल्या अपघातात ३४ प्रवासी जखमी झाले आहेत. जखमींना जिल्हा रुग्णालयात दाखल करण्यात आलं असून त्यांच्यापैकी सहा प्रवाशांची प्रकृती चिंताजनक असल्याचं समजतं.

पश्चिम बंगालमधील अलीपूरद्वार जिल्ह्यातील शमुकतला रोड स्थानकाजवळ मंगळवारी रात्री हा अपघात झाला. रेल्वे प्रशासनानं दिलेल्या माहितीनुसार, गाडीचं इंजिन आणि त्याला जोडून असलेला डबा रुळावरून घसरला आहे. अपघातानंतर वरिष्ठ अधिकाऱ्यांसह रेल्वेचं मदत पथक तातडीनं घटनास्थळी पोहोचलं असून मदतकार्य सुरू आहे. जखमींना अलीद्वारपूर जिल्हा रुग्णालयात दाखल करण्यात आलं आहे. अन्य प्रवाशांना गुवाहाटीला नेण्यासाठी गाडीची व्यवस्था करण्यात आली आहे, अशी माहिती रेल्वे अधिकाऱ्यांनी दिली.