श्रीनगर: दहशतवादी हल्ल्यात २ भारतीय जवान शहीद

श्रीनगर: जम्मू-कश्मीरच्या श्रीनगरच्या पंदाच भागात सीमा सुरक्षा बलाच्या (बीएसएफ) पथकावर दहशतवाद्यांनी हल्ला केला आहे. या हल्ल्यात बीएसएफचे दोन जवान शहीद झाले. या हल्ल्यात जखमी झालेल्या जवानांना उपचारासाठी रुग्णालयात दाखल करण्यात आले. मात्र, ते गंभीर जखमी झाले होते. या हल्ल्यात ते शहीद झाले आहेत. भारतीय जवान गंभीर जखमी झाल्यानंतर त्यांची हत्यारे दहशतवाद्यांनी पळवल्याचे वृत्त आहे.

या हल्ल्याबाबत प्राथमिक माहितीनुसार, सीमा सुरक्षा दलाच्या ३७ बटालियन गस्त घालून परतत असताना अचानक दहशतवाद्यांनी त्यांच्यावर हल्ला केला. हा हल्ला अचानक झाल्याने जवानांना सावरण्यासाठी जराही वेळ मिळू शकला नाही. या हल्ल्यानंतर इतर जवान आणि स्थानिक लोकांनी तातडीने जखमी जवानांना नजिकच्या रुग्णालयात नेले. या हल्ल्यात एकूण ७ जवान जखमी झाल्याचे सांगण्यात येत आहे. या ७ जवानांपैकी २ जवान गंभीर जखमी झाले होते. त्यामुळे त्यांना स्किम्स सौरा येथे हलवण्याचा निर्णय घेण्यात आला. मात्र, तेथे हलवताना ते वाटेतच शहीद झाले.