काश्मिरी खेळाडूंना अमेरिकेने व्हिसा नाकारला?

मटा ऑनलाइन वृत्त। श्रीनगर

'अमेरिकेने आपल्या नव्या धोरणानुसार आम्हाला व्हिसा देण्यास नकार दिला आहे' असा आरोप श्रीनगरच्या दोन स्कीइंग खेळाडूंनी केला आहे. न्यूयॉर्कच्या सार्नक लेक गावचे महापौर क्लाइड रेबिड्यू यांनीही भारतीय व्हिसा नाकारल्याचे म्हटले आहे.

महापौर रेबिड्यू यांनी आपल्या फेसबुक पोस्टमध्ये लिहिले आहे की, 'अमेरिकेच्या नव्या धोरणानुसार भारतीय स्नो शूअरला व्हिसा देण्यास नकार देण्यात आला आहे. याबाबत आमचे काश्मीरचे मित्र आबिद खान यांनी फेसबुक पोस्टद्वारे ही माहिती दिली आहे.'

याबाबत अधिक माहिती देताना महापौर म्हणाले, 'व्हिसा मिळण्यासाठी आवश्यक असणारी सर्वच कागदपत्रे या दोन्ही खेळाडूंकडे होती. मात्र नवी दिल्लीतील अमेरिकी दूतावासातील एक महिला अधिकारी सर्व कागदपत्रांची तपासणी करण्यासाठी दुसऱ्या खोलीत गेली. परत आल्यानंतर तिने व्हिसा देण्यास नकार दिला. 'आमच्या नव्या धोरणानुसार आम्ही आपल्याला विजा देऊ शकणार नाही', असे ती महिला अधिकारी या खेळाडूंना म्हणाली.'

काश्मीरच्या ज्या दोन खेळाडूंना व्हिसा नाकारण्यात आला आहे त्या खेळाडूंची नावे आबिद खान आणि तनवीर हुसैन अशी आहेत. हे दोघेही २४-२५ फेब्रुवारीला न्यूयॉर्कमध्ये आयोजित करण्यात आलेल्या 'वर्ल्ड स्नोशू चॅम्पियनशिप २०१७' मध्ये भाग घेतला आहे.

तथापि, याबाबत अमेरिकी दूतावासाकडून अद्याप काहीही प्रतिक्रिया जाहीर करण्यात आलेली नाही.

ट्रम्प सरकारने निवडक मुस्लीम देशांच्या नागरिकांवर अमेरिकेत येण्यावर घातलेल्या बंदीचा भारतीय नागरिकांवर कोणताही परिणाम होणार नाही असे नवी दिल्लीतील अमेरिकी दूतावासाने स्पष्ट केले होते. मात्र असे असले तरी ट्रम्प यांच्या नव्या धोरणामुळेच दोन भारतीय खेळाडूंना व्हिसा नाकारण्यात आल्याचे मानले जात आहे.