कोंबड्यांना बाइकवर उलटे टांगणाऱ्यांना अटक

मटा ऑनलाइन वृत्त। बस्ती (यूपी)

उत्तर प्रदेशातील बस्ती जिल्ह्यात कोंबड्याशी क्रूरतेने वागल्याच्या आरोपाखाली पोलिसांनी दोन युवकांविरोधात गुन्हा दाखल करत त्यांना अटक केली आहे. हे दोन युवक कोंबड्यांना बाइकवर उलटे टांगून घेऊन जात होते. पोलिसांनी प्राण्यांविरोधातील क्रूरतेला प्रतिबंध करणाऱ्या १९६०च्या कायद्यांतर्गंत ही कारवाई केली.

पोलिसांच्या या कारवाईमुळे कोंबड्या विकण्याचा व्यवसाय करणाऱ्यांमध्ये खळबळ माजली आहे. कारवाई करणाऱ्या पोलिसांनी या घटनेबाबत माहिती देताना सांगितले की, रामजानकी मार्गावर दोन युवक कोंबड्यांना बाइकवर उलटे टांगून विकण्यासाठी जात होते. पोलिसांनी त्यांचा पाठलाग करून त्यांना पकडले आणि पोलीस स्टेशनला घेऊन आले.

गायघाट परिसरातील राहणाऱ्या या युवकांची नावे महताब आणि मोहरम अली अशी आहेत. पोलिसांनी त्यांच्या विरुद्ध प्राण्यांविरोधातील क्रूरतेला प्रतिबंध करणाऱ्या १९६० च्या कायद्यांतर्गत गुन्हा नोंदवला आहे. या युवकांकडून २७ कोंबडे जप्त करण्यात आले. हे दोन युवक या कोंबड्यांना अमानुषपणे उलटे टांगून घेऊन जात होते. त्यावेळी कोंबड्यांच्या चोचींमधून रक्तही ओघळत होते अशी माहिती पोलिसांनी दिली.