थट्टामस्करीत अल्पवयीन मुलांनी बस पळवली आणि...

चेन्नई:

महाराष्ट्र टाइम्स.कॉम

थट्टामस्करी जीवावरही बेतू शकते, याचा प्रत्येय चेन्नईतील एका घटनेनं नुकताच आला. दोन अल्पवयीन मुले मौजमजा म्हणून पार्किंगमध्ये उभी केलेली खासगी कंपनीची बस घेऊन पळून गेले, पण काही अंतरावर गेल्यानंतर बस वीजेच्या खांबाला धडकली. या अपघातातून ते सुदैवानं बचावले.

त्रिपलीकेन परिसरातील पार्किंगमध्ये रविवारी दुपारी चालक खासगी बस उभी करून कुठेतरी निघून गेला होता. त्याचवेळी दोन अल्पवयीन मुलं पार्किंगमध्ये गेले. थट्टामस्करीत त्यातील एकानं बस सुरू केली. तर दुसरा मुलगा त्याच्या बाजूला बसून त्याला सूचना देऊ लागला. त्यांनी बस रस्त्यावर नेली. वेडीवाकडी वळणे घेत भरधाव बस रस्त्यावर धावू लागल्यानं तिथं काही वेळ गोंधळ उडाला. काही लोकांनी कसाबसा जीव वाचवला. काही अंतरावर गेल्यानंतर बस एका वीजेच्या खांबाला धडकली. सुदैवानं मुलांना कोणतीही दुखापत झाली नाही. अपघातानंतर मुलं घाबरली आणि त्यांनी पळून जाण्याचा प्रयत्न केला. एका रिक्षाचालकानं त्यांना पकडलं आणि पोलिसांच्या ताब्यात दिलं. त्यांची चौकशी करण्यात येत आहे, अशी माहिती पोलिसांनी दिली.