पत्नीशी भांडण; पतीनं स्वतःला स्फोटानं उडवलं

उदयपूर:

पत्नीशी भांडण झाल्यानंतर एका तरुणानं डेटोनेटर बांधून स्वतःला स्फोटानं उडवून दिल्याची धक्कादायक घटना राजस्थानात घडली आहे. यात तरुणाचा जागीच मृत्यू झाला असून, पोलीस या घटनेची कसून चौकशी करत आहेत.

राजस्थानातील उदयपूर शहरात रविवारी रात्री ही धक्कादायक घटना घडली. गोवर्धन विलास पोलीस ठाण्याच्या क्षेत्रात एका निर्जन ठिकाणी या तरुणानं स्वतःला डेटोनेटर लावून स्फोटानं उडवून दिलं. विनोद मीणा (वय ३०) असं त्याचं नाव आहे. त्याचे गेल्या काही दिवसांपासून पत्नीशी खटके उडत होते. त्यामुळे ती चार-पाच दिवसांपूर्वी घरातून निघून गेली होती, असं सांगण्यात येतं.

विनोद एका खाणीत दगड फोडण्याचं काम करत होता. पत्नी घरी न परतल्यानं विनोदनं स्वतःच्या पोटाला डेटोनेटर बांधले आणि आग लावली. त्यानंतर झालेल्या स्फोटात त्याचा जागीच मृत्यू झाला. विच्छेदनानंतर त्याचा मृतदेह अंत्यसंस्कारासाठी कुटुंबीयांकडे सोपवला आहे, अशी माहिती पोलिसांनी दिली.