विद्यापीठांच्या नावातून 'हिंदू-मुस्लिम' हटवा

मटा ऑनलाइन वृत्त । अलिगड

काशी हिंदू विद्यापीठ आणि अलिगड मुस्लिम विद्यापीठाच्या नावातून हिंदू आणि मुस्लिम हे शब्द वगळण्यात यावा असा सल्ला विद्यापीठ अनुदान आयोगाच्या (युजीसी) एका पॅनलने दिला आहे. या शब्दांमुळे विद्यापीठांची धर्मनिरपेक्षता दिसत नाही, असा दावा युजीसीच्या या पॅनलने केला आहे.

दहा केंद्रीय विद्यापीठातील अनियमिततेची चौकशी करण्यासाठी युजीसेने या पॅनलची स्थापना केली होती. अलिगड मुस्लिम विद्यापीठाच्या (एएमयू) लेखा परिक्षा अहवालात या पॅनलने हा सल्ला दिला आहे. केंद्र सरकारच्या अनुदानावर चालणारी विद्यापीठे धर्मनिरपेक्ष असतात. मात्र या दोन्ही विद्यापीठांच्या नावात धर्माचा उल्लेख असल्याने त्यातून विद्यापीठाचा धर्मनिरपेक्षपणा दिसून येत नाही, असं या पॅनलच्या एका पदाधिकाऱ्याने सांगितलं. या विद्यापीठांना अलिगड विद्यापीठ आणि काशी विद्यापीठही म्हटल्या जाऊ शकते किंवा या विद्यापीठांची नावे त्यांच्या संस्थापकांच्या नावानेही ठेवली जाऊ शकतात, असंही या पदाधिकाऱ्याने सांगितलं.

एएमयू आणि बीएचयू शिवाय ज्या विद्यापीठांची लेखा परिक्षा झाली आहे. त्यात पुडुचेरी विद्यापीठ, अलहाबाद विद्यापीठ, हेमवती नंदन बहुगुणा गढवाल विद्यापीठ, झारखंड केंद्रीय विद्यापीठ, राजस्थान केंद्रीय विद्यापीठ, जम्मू केंद्रीय विद्यापीठ, महात्मा गांधी आंतरराष्ट्रीय हिंदी विद्यापीठ, त्रिपुरा विद्यापीठ आणि हरी सिंह गौर विद्यापीठाचा समावेश आहे.