केंद्रीय मंत्री स्मृती इराणी यांना करोनाची लागण; स्वत: ट्विट करत दिली माहिती

नवी दिल्ली: केंद्रीय मंत्री स्मृती इराणी (Smriti Irani) यांना करोनाची लागण झाल्याचे स्पष्ट झाले आहे. स्वत: इराणी यांनी ट्विट करत ही माहिती दिली आहे. जे लोक माझ्या संपर्कात आले आहेत, अशांनी कृपया लवकरात लवकर आपली तपासणी करून घ्यावी असे आवाहनही इराणी यांनी ट्विटद्वारे केले आहे.

मला या घोषणेसाठी शब्द शोधावे लागत आहेत, हे दुर्मिळ आहे. म्हणून मी सोपे शब्द वापरते. मला करोनाची लागण झाली असून माझ्या संपर्कात आलेल्या लोकांनी नक्कीच तपासणी करून घ्या, असे इराणी म्हणाल्या.


केंद्रीय मंत्री स्मृती इराणी या बिहार निवडणुकीच्या प्रचारातील भारतीय जनता पक्षाच्या स्टार प्रचारक आहेत. त्या मोठ्या उत्साहाने बिहारमध्ये निवडणुकीचा प्रचार करत होत्या. मात्र, त्यांना करोनाची लागण झाल्याचे स्पष्ट झाल्यानंतर आता त्यांना प्रचारापासून दूर राहावे लागणार आहे. बिहारमधील उपमुख्यमंत्री आणि भाजप नेते सुशील मोदी यांनाही करोनाची लागण झाल्याचे स्पष्ट झाले आहे.

स्मृती इराणी यांनी मंगळवारी गोपालगंज येथे एका सभेला संबोधित केले होते. या सभेत त्यांनी राष्ट्रीय जनता दलावर जोरदार टीकास्त्र सोडले होते.

यापूर्वी केंद्रीय गृहमंत्री अमित शहा, धर्मेद्र प्रधान, नितीन गडकरी, कृष्णपाल गुर्जर, श्रीपाद नाइक, अर्जुन राम मेघवाल, गजेंद्रसिंह शेखावत यांना करोनाची लागण झाली होती. हे सर्व मंत्री बरे होऊन घरी आले आहेत. मात्र करोनाचा संसर्ग झालेले राज्यमंत्री सुरेश अंगडी यांचे एम्समध्ये निधन झाले. रामदास आठवले यांना देखील करोनाची लागण झालेली आहे.

क्लिक करा आणि वाचा- बिहार निवडणूक: भाजपची राहुल गांधी यांच्या विरोधात निवडणूक आयोगाकडे तक्रार

केंद्रीय मंत्री रामदास आठवले यांना करोनाची सौम्य लक्षणं जाणवत आहेत. खबरदारीचा उपाय म्हणून त्यांना मुंबईतील बॉम्बे रुग्णालयात दाखल करण्यात आलं आहे.

क्लिक करा आणि वाचा- बिहार निवडणूक: प्रचारादरम्यान माझ्यावर बलात्कार होण्याची शक्यता होती- अमीषा पटेल
क्लिक करा आणि वाचा- हिंदुत्व हे राज्यघटनेतील मू्ल्यांच्या विरोधी; ओवेसींचे टीकास्त्र