उत्तर प्रदेशातही सपा-बसपाचे आमदार फुटले!

मटा ऑनलाइन वृत्त । लखनऊ

बिहार, गुजरातनंतर उत्तर प्रदेशातही राजकीय उलथापालथ पाहायला मिळत असून माजी मुख्यमंत्री अखिलेश यादव यांचे निकटवर्तीय मानले जाणारे आमदार बुक्कल नवाब यांनी आपल्या सदस्यत्वाचा राजीनामा दिला आहे. बुक्कल यांच्यासह सपाचे आणखी एक आमदार यशवंत सिंह आणि बसपाचे जयवीर सिंह यांनीही आमदारकी सोडली आहे. हे तीनही आमदार भाजपच्या संपर्कात असल्याचे सांगण्यात येत आहे.

समाजवादी पक्ष आता एक पक्ष राहिलेला नाही तर आखाडा बनला आहे. गेल्या वर्षभरापासून पक्षात घुसमट होत होती म्हणूनच मी पक्षाचा आणि विधान परिषद सदस्यत्वाचा राजीनामा दिल्याचे बुक्कल नवाब यांनी सांगितले. राम मंदिर अयोध्येतच होणार असे म्हणत त्यांनी मुख्यमंत्री योगी आदित्यनाथ आणि पंतप्रधान नरेंद्र मोदी यांच्या कामाचे कौतुक केले. भाजपने संधी दिल्यास आपण भाजपमध्ये प्रवेश करणार असेही ते म्हणाले.

बुक्कल आणि यशवंत सिंह यांच्यानंतर सपाचे आणखी तीन आमदार पक्षाला रामराम करण्याची शक्यता वर्तविली जात आहे.

विशेष म्हणजे भाजपचे राष्ट्रीय अध्यक्ष अमित शहा आजच लखनऊमध्ये दाखल झाले आहेत. ते तीन दिवस लखनऊ मुक्कामी आहेत. असे असतानाच सपा-बसपात सुरू झालेली फाटाफूट हा केवळ योगायोग आहे की यामागे भाजपची चाल आहे, याबाबत तर्क लावले जात आहेत.