तीन बांगलादेशी दहशतवाद्यांना अटक

लखनऊ :

उत्तर प्रदेशच्या दहशतवादविरोधी पथकाने (एटीएस) तीन बांगलादेशी दहशतवाद्यांना अटक केली असून, अन्सरुल्लाह बांगला टीम (एबीटी) या इस्लामी कट्टरवादी गटाशी त्यांचा संबंध असल्याचा संशय आहे.

मोहम्मद इम्रान, रज्जुद्दीन आणि मोहम्मद फिरदोस अशी या तिघांची नावे असून तिघेही एकमेकांचे भाऊ आहेत. बुधवारी संध्याकाळी लखनऊ स्थानकात हावडा-अमृतसर एक्स्प्रेसमध्ये शिरण्याच्या प्रयत्नात असताना त्यांना ताब्यात घेण्यात आले. आपण बांगलादेशचे नागरिक असल्याचे त्यांनी कबूल केले असून, त्यांच्याकडे बनावट आधारकार्डेही सापडली. त्यानंतर त्यांना अटक करण्यात आली. ‘एबीटी’शी संबंधित असलेल्या अब्दुल्लाह या दहशतवाद्याला ६ ऑगस्ट रोजी ‘एटीएस’ने अटक केल्यानंतर या तिघांची नावे पुढे आली होती. तेव्हापासून ‘एटीएस’ त्यांच्या मागावर होती.