पोलिसांनी मीडियासमोर केले 'लाइव्ह एन्काउंटर'

अलीगड (उत्तर प्रदेश)

महाराष्ट्र टाइम्स.कॉम

उत्तर प्रदेशातील अलीगड जिल्ह्यात पोलिसांनी आज (गुरुवार) दोन गुन्हेगारांचे मीडियासमोर लाइव्ह एन्काउंटर केल्याची घटना घडली. या दोन गुन्हेगारांनी दोन साधुंसह एकूण सहा जणांची हत्या केली आहे. या एन्काउंटरसाठी वृत्तवाहिन्यांच्या प्रतिनिधींना बोलावण्यात आले होते. आज संध्याकाळी ६.३०च्या सुमारास हे एन्काउंटर करण्यात आले.

हा एन्काउंटरचा प्रसंग वृत्तवाहिनींच्या प्रतिनिधींनी कॅमेऱ्यात कैद केला. चकमकीत ठार करण्यात आलेल्या गुन्हेगारांची नावे मुस्तकीम आणि नौशाद असल्याचे सांगण्यात येत आहे.

एन्काउंटरदरम्यान व्हिडिओत पोलीस अधिकारी अजयकुमार साहनी यांच्यासह इतर पोलीस कर्मचारी दिसत आहेत. हे एन्काउंटर शासकीय कार्यालये असलेल्या एका जुन्या इमारतीत झाले. या व्हिडिओत पोलीस फायरिंग करताना दिसत आहेत.