'अखिलेश सरकार तरुणांच्या स्वप्नांशी खेळंतय'

मटा ऑनलाइन वृत्त । बदाऊन

येथील प्रचारसभेत आज पुन्हा पंतप्रधान नरेंद्र मोदी यांनी मुख्यमंत्री अखिलेश यादव यांना लक्ष्य केलं. अखिलेश सरकार स्वत:च्या राजकीय फायद्यासाठी तरुणांच्या स्वप्नांशी खेळत आहे. इतकी वर्षे या सरकारने केवळ गुंडांना आणि सराईत गुन्हेगारांना पाठीशी घातलं आहे, असा आरोप मोदींनी केला.

'बदाऊनचा समावेश १०० मागास जिल्ह्यांमध्ये होतो. समाजवादी पक्ष आणि बहुजन समाज पार्टी सत्तेत असताना विकासाची फळे बदाऊनपर्यंत का पोहोचली नाहीत,' असा सवाल मोदींनी विचारला.

अखिलेशचा चुलत भाऊ आणि बदाऊनचे खासदार धर्मेंद्र यादव यांच्या माध्यमातूनही मोदींनी अखिलेशवर निशाणा साधला. बदाऊनचे आमदार आबिद रजाने धर्मेंद्र यादवांवर अवैध खणन आणि वीजेच्या तारांसंदर्भातल्या भ्रष्टाचारचे आरोप केले होते. पक्षाचाच आमदार त्याच पक्षाच्या खासदारावर आरोप करतो. ही तक्रार मुलायमच्या समोर आली असती तर त्यांनी 'बच्चे हैं, गलती हो जाती हैं,' असे म्हटले असते, असा टोला मोदींनी लगावला. २०१४ मध्ये बलात्कारविरोधी गुन्ह्यासंदर्भात बोलताना मुले चूक करतात, असे बोलून देशात खळबळ उडवून दिली होती. त्याचा संदर्भ देत मोदींनी हा चिमटा काढला.

भाजपच्या कार्यकर्त्यांना तुरुंगात डांबण्याच्या प्रकारावर पंतप्रधानांनी निषेध व्यक्त केला. समाजवादी पार्टी स्वत:च्या फायद्यासाठी कायद्याचा दुरुपयोग करत असल्याची टीकाही मोदी यांनी यावेळी केली.