नडला अन् जिंकला! २० रुपयांसाठी रेल्वेशी पंगा; तब्बल २२ वर्षे लढला; आता दणकून भरपाई मिळणार

मथुरा: भारतीय रेल्वेविरोधात खटला दाखल करणारा वकील अखेर २२ वर्षांनी जिंकला आहे. अवघ्या २० रुपयांसाठी वकील तुंगनाथ चतुर्वेदी यांनी लढा दिला. २२ वर्षांनंतर त्यांच्या लढ्याला यश आलं आहे. आता रेल्वेला तुंगनाथ यांना तब्बल २० हजार रुपयांची भरपाई द्यावी लागणार आहे.

उत्तर प्रदेशच्या मथुरामध्ये वास्तव्यास असलेले वकील तुंगनाथ चतुर्वेदी यांच्याकडून बुकिंग क्लर्कनं २० रुपये अधिक घेतले होते. त्या प्रकरणात त्यांनी ग्राहक पंचायतीत खटला दाखल केला. ही घटना १९९९ मधली आहे. २५ डिसेंबर १९९९ रोजी तुंगनाथ चतुर्वेदी मथुरा केंट स्टेशनला पोहोचले. त्यांना मुरादाबादला जायचं होतं. त्यांनी बुकिंग क्लर्कला दोन तिकिटं देण्यास सांगितली. त्यावेळी एका तिकिटाचा दर ३५ रुपये होता. मात्र बुकिंग क्लर्कनं तुंगनाथ यांच्याकडून ७० रुपयांऐवजी ९० रुपये घेतले.
भिंतींवर लिपस्टिकनं लिहिली पतीच्या अत्याचारांची कहाणी; महिलेची आत्महत्या, शेजारी हळहळले
एका तिकिटाची किंमत ३५ रुपये असल्यानं तुंगनाथ यांनी बुकिंग क्लर्कला २० रुपये परत देण्यास सांगितले. मात्र त्यानं पैसे देण्यास नकार दिला. दोघांमध्ये बराच वाद झाला. त्याचवेळी पॅसेंजर ट्रेन आली आणि तुंगनाथ ट्रेन पकडायला गेले. मात्र हा प्रकार त्यांच्या लक्षात राहिला. प्रवास पूर्ण झाल्यानंतर त्यांनी या प्रकरणी मथुऱ्यातील जिल्हा ग्राहक पंचायतीत खटला दाखल केला. ईशान्य रेल्वे गोरखपूर आणि मथुरा केंट रेल्वे स्थानकाचे विंडो बुकिंग क्लर्क यांच्याविरोधात तुंगनाथ यांनी खटला दाखल केला.
जिथे कन्हैयालालची हत्या, तिथेच मोहरमच्या मिरवणुकीत ताजिया पेटला; हिंदू कुटुंबाने...
२२ वर्षे तुंगनाथ २० रुपयांसाठी लढले. हा संघर्ष केवळ २० रुपयांसाठी नव्हता, तर सार्वजनिक हितासाठी होता, असं तुंगनाथ यांनी सांगितलं. या प्रकरणात उशिरा निर्णय आला. मात्र याबद्दल मी समाधानी आहे. माझी मेहनत वाया गेली नाही, अशी भावना त्यांनी व्यक्त केली.

रेल्वेला तुंगनाथ यांना २० हजार रुपये द्यावे लागणार आहेत. २० रुपयांवर दर वर्षी १२ टक्के व्याज, मानसिक, आर्थिक आणि खटल्यावर खर्च झालेले १५ हजार रुपये इतकी रक्कम तुंगनाथ यांना मिळणार आहे. ३० दिवसांत ही रक्कम रेल्वेला द्यावी लागेल. रेल्वेनं ही रक्कम न दिल्यास त्यांना २० रुपयांवर १५ टक्के व्याज द्यावं लागेल.