'ही तर देश आणि उत्तर प्रदेश लुटणाऱ्या घराण्यांची आघाडी'

मटा ऑनलाइन वृत्त । बिजनौर

उत्तर प्रदेशच्या निवडणूक प्रचाराच्या आपल्या चौथ्या रॅलीत पंतप्रधान नरेंद्र मोदी यांनी बिजनौरमध्ये अखिलेश यादव आणि काँग्रेस उपाध्यक्ष राहुल गांधी यांच्यावर टीकेची झोड उठवली. उत्तर प्रदेशातली सपा-काँग्रेस ही दोन पक्षांची आघाडी नाही, दोन घराण्यांची आघाडी आहे. एका घराण्याने देशाला ७० वर्ष लुटले आहे, तर दुसऱ्याने उत्तर प्रदेशला.

या भाषणात मोदींनी एकदाही नोटाबंदीचा उल्लेखही केला नाही. भ्रष्टाचार, कायद्याचा दुरुपयोग आदि अनेक मुद्द्यावंर अखिलेश सरकारचा समाचार घेतला. ते म्हणाले, 'समाजवादी पार्टी आणि काँग्रेस हे पक्ष नाहीत, घराणी आहेत. एक दिल्लीचे आणि दुसरे सैफईचे. यांना वाटते की राजकारण आमचे आहे, कोणी सामान्य माणूस यात घुसू शकत नाही. २००० गावांमधून एक खासदार निवडून येतो, पण इथे एका सैफीत खासदारच खासदार, आमदारच आमदार आहेत. एकाच गावात इतके नेते कसे? तुमच्यात योग्यता नाही? हे असे घराणे आहे ज्याने जातीची वोटबँक तर बनवली पण जातीचे भले केले नाही. फक्त एक परिवार, एका गावाचे भले झाले.'

गुगल सर्च केलं तर सर्वाधिक खिल्ली राहुल गांधींची उडवलेली दिसते, असे सांगत ज्या नेत्याला त्याच्याच पक्षाचे नेते दूर ठेवतात अशा नेत्याला अखिलेशने जवळ केल्यामुळे अखिलेशच्याही हुशारीवर मला शंका येतेय, असे मोदी म्हणाले. उत्तर प्रदेशात अंधार पडल्यावरच नाही दिवसाढवळ्याही माता-बहिणी घरातून बाहेर पडत नाहीत, असे सांगत कायदा-सुव्यवस्थेवर मोदींनी बोट ठेवले. बलात्काराबाबत समाजवादी पार्टीच्या नेत्यांनी केलेल्या बेताल वक्तव्यांचीही आठवण त्यांनी करून दिली.