पंतप्रधानांवर टीका करताना लालूंची जीभ घसरली

मटा ऑनलाइन वृत्त । वाराणसी

उत्तर प्रदेश विधानसभा निवडणूक प्रचार सभेत वादग्रस्त वक्तव्य करणाऱ्यांमध्ये आता राष्ट्रीय जनता दलाचे नेते लालू प्रसाद यादव यांचेही नाव जोडले गेले आहे. पंतप्रधान नरेंद्र मोदींवर टीका करताना लालूंची जीभ घसरली. लालू यांनी मोदींवर टीका करताना अपशब्द वापरत माजी पंतप्रधान अटलबिहारी वाजपेयी यांच्या आजाराची चौकशी करण्याची मागणी केली.

मिरजापूर जिल्ह्यातील मडिहान भागात काँग्रेस व समाजवादी पक्षाच्या उमेदवारांसाठी राष्ट्रीय जनता दलाचे अध्यक्ष लालू प्रसाद यादव यांची जाहीर सभा झाली. त्यावेळी लालू प्रसाद यादव यांनी पंतप्रधान मोदी आणि भाजप अध्यक्ष अमित शहा यांच्यावर सडकून टीका केली. मात्र, ही टीका करताना लालू यांची जीभ घसरल्याने त्यांनी बोलण्याच्या ओघात अपशब्द वापरले. माजी पंतप्रधान अटलबिहारी वाजपेयी यांच्या आजारामागे पंतप्रधान नरेंद्र मोदी आणि अमित शहा यांचे षडयंत्र असल्याचा आरोप त्यांनी केला. भाजप ही अफवा पसरवणारा आणि दंगली घडवणारा पक्ष असल्याची टीका लालूंनी केली. मोदी यांनी होळी साजरी करणार असल्याचे सांगितले. मात्र, त्यापूर्वीच आम्हीच होळी दहन करणार असल्याचे लालू यांनी म्हटंले.