आता स्वतःच आयकर भराः योगी आदित्यनाथ

लखनऊः उत्तर प्रदेशातील मुख्यमंत्री, मंत्रिमंडळातील मंत्री यांना आपापला आयकर आता स्वतःच भरावा लागणार आहे. सरकारी तिजोरीतून मंत्र्यांचा आयकर भरण्याच्या ३८ वर्षे जुन्या परंपरेला तिलांजली देण्याची घोषणा मुख्यमंत्री योगी आदित्यनाथ यांनी केली आहे.

उत्तर प्रदेशातील माजी मुख्यमंत्री, तत्कालीन मंत्रिमंडळातील मंत्री यांना स्वतःच आयकर भरावा लागणार आहे. राज्यातील विद्यमान मंत्र्यांव्यतिरिक्त १८ माजी मंत्री आणि मुख्यमंत्र्यांचा आयकर सरकारी तिजोरीतून भरला जायचा. मात्र, नव्या निर्णयामुळे सरकारी तिजोरीवरील भार हलका होणार आहे.

गेल्या दोन आर्थिक वर्षांतील सर्व मंत्र्यांचा एकूण ८६ लाखांचा आयकर सरकारी तिजोरी भरण्यात आला. तत्कालीन मुख्यमंत्री व्ही. पी. सिंह यांच्या कार्यकाळात हा निर्णय घेण्यात आला होता. राज्य सरकारमधील बहुतांश मंत्री गरीब आहेत. त्यामुळे त्यांच्या आयकराची जबाबदारी सरकारने घ्यावी, असे व्ही. पी. सिंह यांनी हे विधेयक विधानसभेत मांडताना म्हटले होते. दरम्यान, नव्या निर्णयावर राज्यातील मंत्र्यांनी कोणतीही प्रतिक्रिया नोंदवलेली नाही.