काँग्रेस सरकारमुळं विकास ठप्प झाला: मोदी

मटा ऑनलाइन वृत्त | भावनगर (गुजरात)

विकासाच्या मुद्द्यावरून भाजपला सातत्यानं लक्ष्य करणाऱ्या काँग्रेसवर आज, रविवारी पंतप्रधान नरेंद्र मोदी यांनी निशाणा साधला. गुजरातचा मुख्यमंत्री असताना काँग्रेसच्या नेतृत्त्वाखालील यूपीए सरकारनं विकास प्रकल्पांना जाणीवपूर्वक विरोध केला. त्यामुळं गुजरातचा विकास पूर्णपणे ठप्प झाला होता, अशी टीका मोदींनी केली.

गेल्या महिनाभरात मोदी तिसऱ्यांदा गुजरात दौऱ्यावर आले आहेत. यावेळी त्यांनी घोघा-दहेजदरम्यान 'रो-रो फेरी' सेवेचा शुभारंभ केला. त्यानंतर भावनगरमधील जाहीर सभेत विकासाच्या मुद्द्यावरून काँग्रेसवर टीकेची झोड उठवली. मी मुख्यमंत्री असताना केंद्रातील काँग्रेसच्या नेतृत्त्वाखालील यूपीए सरकारनं गुजरातचा विकास रोखण्यात कोणतीच कसर सोडली नाही, असा आरोप त्यांनी केला.

वापीपासून कच्छमधील मांडवीपर्यंत विकासाची दारं बंद करण्यात आली होती. पर्यावरणाच्या नावाखाली उद्योग बंद पाडण्याच्या धमक्या देण्यात आल्या. मुख्यमंत्री असताना गुजरातच्या विकासासाठी किती संघर्ष करावा लागला हे मलाच ठाऊक आहे, असंही मोदी म्हणाले.