आंतरजातीय विवाहातून ऑनर किलिंग

वृत्तसंस्था, कानपूर

एका दलित महिलेशी विवाह केलेल्या १९ वर्षीय उच्चवर्णीय तरुणाची 'ऑनर किलिंग'च्या प्रकरणातून गोळी झाडून हत्या करण्यात आल्याची घटना उत्तर प्रदेशात कानपूर येथे घडली. बिरहाना या उच्चभ्रू वस्तीतील रस्त्यावर फील खाना पोलिस ठाण्यापासून जेमतेम ५०० यार्डांवर रविवारी पहाटे ही घटना घडली.

सोनू सिंह उर्फ नारू असे हत्या झालेल्या तरुणाचे नाव असून तो सिरकी मोहाल येथे राहणारा होता. सोनू याच्या पत्नीचे काका आशीष सोनकार यांच्यासह किमान पाच जण दोन मोटरसायकलवरून आले आणि त्यांनी सिंह याला गोळ्या घातल्या, अशी माहिती कोतवालीचे सर्कल अधिकारी अजय कुमार यांनी दिली. पोलिसांनी घटनास्थळी धाव घेत रक्ताच्या थारोळ्यात पडलेल्या सोनू याला रुगणालयात नेले, मात्र रुग्णालयात नेत असतानाच त्याचा मृत्यू झाला. पोलिसांनी प्रमुख संशयितांना ताब्यात घेतले आहे.

सोनू याने काही महिन्यांपूर्वीच एका दलित महिलेशी विवाह केला होता. त्या महिलेच्या नातेवाइकांचा या लग्नाला विरोध होता. आंतरजातीय विवाह हे या हत्येमागील कारण असावे, असा अंदाज पोलिसांनी व्यक्त केला आहे. महिलेच्या काकांनी भाडोत्री गुंडांकरवी ही हत्या घडवल्याचे पोलिसांनी सांगितले.