'पीपली लाइव'चे सहदिग्दर्शक आरोपातून मुक्त

मटा ऑनलाइन वृत्त । नवी दिल्ली

बॉलिवूडमधील बहुचर्चित चित्रपट 'पीपली लाइव'चे सह दिग्दर्शक महमूद फारुकी यांची बलात्काराच्या आरोपातून दिल्ली हायकोर्टाने निर्दोष मुक्तता केली आहे. फारुकी यांच्यावर कोलंबिया विद्यापीठातील अमेरिकन संशोधक महिलेवर बलात्कार केल्याचा आरोप होता. दिल्लीतील साकेत कोर्टाने या प्रकरणी फारुकी यांना दोषी ठरवलं होतं.

अमेरिकन नागरीक असलेल्या ३५ वर्षीय महिलेने २०१५ मध्ये फारुकी यांच्यावर बलात्काराचा आरोप केला होता. संशोधनासाठी दिल्लीत आले असताना फारुकीने दिल्लीतील आपल्या सुखदेव विहारमधील घरी बोलावून माझ्यावर बलात्कार केला, असं महिलेनं सांगितलं होतं. २८ मार्च २०१५ ला ही घटना घडली. या प्रकरणी अमेरिकन महिलेने दिल्लीतील न्यू फ्रेंड्स कॉलनी पोलीस ठाण्यात फारुकींविरोधात तक्रार दाखल केली होती.

फारुकी यांनी बलात्काराचे फेटाळून लावले होते. यानंतर पोलिसांनी २९ जून २०१६ मध्ये दाखल केलेल्या आरोपपत्रात फारुकी यांनी अमेरिकन महिलेवर बलात्कार केल्याचं नमूद केलं होतं. या प्रकरणी दिल्ली हायकोर्टाने निकाल देत फारुकी यांना निर्दोष ठरवलं आहे. 'सत्य कधीना कधी समोर येतचं', असं सांगत फारुकी यांची पत्नी अनुषा रिजवी महमूद यांनी कोर्टाच्या निकालावर समाधान व्यक्त केलं आहे.