pulwama attack: ‘पुलवामा’मध्ये ‘व्हर्चुअल सिम’चा वापर

वृत्तसंस्था, श्रीनगर

पुलवामा येथे दहशतवादी हल्ला करणाऱ्या 'जैश-ए-महंमद'च्या आत्मघाती हल्लेखोराने 'व्हर्चुअल सिम' वापरल्याचे समोर आले असून या सिम कार्डची सविस्तर माहिती देण्याची विनंती भारत अमेरिकेला करणार आहे. अधिकृत सूत्रांनी ही माहिती दिली.

सूत्रांनी सांगितले, की केंद्रीय तपास पथक आणि जम्मू-काश्मीर पोलिसांनी घटनास्थळावर; तसेच इतर ठिकाणी केलेल्या तपासात ही बाब समोर आली आहे. 'जैश'च्या सीमेपलीकडील दहशतवाद्यांशी आत्मघाती हल्लेखोर आदिल दार हा सातत्याने संपर्कात होता. हल्ल्याचा सूत्रधार मुदासिर खान याचा त्रालमध्ये सुरक्षा दलांबरोबर झालेल्या चकमकीत खात्मा करण्यात आला आहे. पुलवामा येथील दहशतवादी हल्ल्यानंतर भारताने पाकिस्तानातील बालाकोट येथील दहशतवादी तळांवर हवाई हल्ले केले होते. दहशतवादी व्हर्चुअल सिम कार्डचा वापर करीत असल्याची ही नवी पद्धत आहे. अमेरिकेतील सेवा पुरवठादाराकडून हे व्हर्चुअल सिम कार्ड बनवले गेले होते. या तंत्रज्ञानामध्ये कम्प्युटरमध्ये एक टेलिफोन क्रमांक तयार केला जातो आणि यूजर त्याच्या स्मार्टफोनवर सेवा पुरवठादाराकडून आलेले अॅप्लिकेशन डाउनलोड करतो. त्यानंतर हा क्रमांक सोशल नेटवर्किंग साइटबरोबर जोडला जातो. या सोशल नेटवर्किंग साइटकडून व्हेरिफिकेशन कोड तयार केला जातो आणि स्मार्टफोनवर तो पाठवला जातो. हा कोड दिल्यानंतर यूजरला फोन वापरता येतो. पुलवामा हल्ल्यावेळी याच तंत्रज्ञानाचा वापर करून आदिल दार हा 'जैश'च्या; तसेच मुदासिर खानच्या संपर्कात होता. संपर्कासाठी जे क्रमांक वापरण्यात आले, त्याची सुरुवात '+1'ने झाली होती. या फोन क्रमांकासंदर्भात सविस्तर माहिती अमेरिकेकडे मागण्यात येणार आहे.