दुर्मीळ! तरुणाला सतत पोटदुखी; हर्नियाचं ऑपरेशन सुरू असताना डॉक्टरांना दिसलं गर्भाशय अन्...

गोड्डा: झारखंडच्या गोड्डामध्ये एक अतिशय दुर्मीळ घटना घडली आहे. गोड्डाच्या जिल्हा रुग्णालयात एक अजब प्रकार समोर आला. २२ वर्षांच्या तरुणाच्या पोटात गर्भाशय आणि फॅलोपियन ट्यूब होती. साधारणत: महिलांच्या पोटात गर्भाशय असतं. डॉक्टरांनी शस्त्रक्रिया करून गर्भाशय आणि फॅलोपियन ट्युब बाहेर काढली. अशी घटना लाखात एक असल्याचं शस्त्रक्रिया करणारे डॉ. तारा शंकर झा यांनी सांगितलं. शस्त्रक्रियेनंतर तरुणाची प्रकृती स्थिर आहे.

तरुणाला अनेक महिन्यांपासून पोटदुखीचा त्रास सुरू होता. त्याच्या पोटात उजव्या बाजूला हर्निया होता. तर डाव्या बाजूला अंडकोष नसल्याचं डॉक्टरांच्या लक्षात आलं. त्यामुळे डॉक्टरांनी त्याला इतरत्र जाऊन उपचार घेण्याचा सल्ला दिला. मात्र आपण गरीब असल्याचं सांगत उपचारांचा खर्च परवडणारा नाही असं तरुणानं सांगितलं. यानंतर डॉक्टरांनी शस्त्रक्रिया करून हर्निया काढण्याचा निर्णय घेतला.
माझ्या दिव्याला शोधा हो! २ वर्षांच्या लेकीला घेऊन पोलिसांसमोर रडायचा; ७ महिन्यांनी गूढ उककलं
तरुण हर्नियाच्या शस्त्रक्रियेसाठी गुरुवारी जिल्हा रुग्णालयात दाखल झाला. शुक्रवारी त्याच्यावर शस्त्रक्रिया सुरू झाली. याचवेळी डॉक्टरांना त्याच्या पोटात गर्भाशय आणि फॅलोपियन ट्युब दिसली. डॉक्टरांनी हर्नियासोबतच गर्भाशय आणि फॅलोपियन ट्युबदेखील काढली. अशी घटना लाखात एक असल्याचं डॉ. तारा शंकर झा यांनी सांगितलं. गोड्डा जिल्ह्यात अशा प्रकारची ही पहिलीच घटना असल्याचं झा म्हणाले. अशा प्रकाराला ट्रू हर्माप्रोडाइट असं म्हणतात. अशा व्यक्तींमध्ये दोन लिंगांचे अंतर्गत अवयव असतात. महिला आणि पुरुष दोन्हींचे अवयव अशा व्यक्तींमध्ये असतात.