उत्तर प्रदेशात पहिल्या टप्प्याचं मतदान सुरू

मटा ऑनलाइन वृत्त । लखनऊ

केंद्रातील मोदी सरकारच्या पुढील वाटचालीसाठी व राज्यातील सत्ताधारी समाजवादी पक्षाच्या भवितव्यासाठी निर्णायक ठरू शकणाऱ्या उत्तर प्रदेशातील विधानसभा निवडणुकीच्या पहिल्या टप्प्याच्या मतदानाला सुरुवात झाली आहे. राज्यातील एकूण ७३ जागांसाठी हे मतदान होत असून अनेक दिग्गजांचं भवितव्य आज मतपेटीत बंद होणार आहे.

सकाळी सात वाजल्यापासून मतदानाला सुरुवात झाली आहे. ऐंशी, नव्वदीतल्या वृद्धांसह तरुण-तरुणीही मोठ्या संख्येनं मतदानासाठी बाहेर पडत आहेत. बोचऱ्या थंडीची पर्वा न करता अंगाला शाली गुंडाळून लोकांनी मतदानासाठी रांगा लावल्या आहेत. ईव्हीएम मशिनमधील तांत्रिक बिघाडामुळं काही ठिकाणी मतदानास उशिरा सुरुवात झाली. मात्र, एकंदर मतदान सुरळीत सुरू असून मतदारांमध्ये प्रचंड उत्साह आहे. अनेक ठिकाणी निवडणूक कर्मचाऱ्यांनी मतदारांचं गुलाबाचं फुल देऊन स्वागत केलं.

गोमांस ठेवल्याच्या अफवेवरून हत्याकांड झालेलं बिसाहडा, सामूहिक बलात्कारामुळं चर्चेत आलेलं बुलंदशहर, दंगलग्रस्त मुझफ्फरनगरसह राष्ट्रीय लोकदलाचा परंपरागत मतदारसंघ असलेल्या बागपतमध्येही आजच मतदान होत आहे. येथील जनतेचा कल सर्वच पक्षांसाठी महत्त्वाचा ठरणार आहे. भाजपचे वादग्रस्त आमदार संगीत सोम यांचंही भवितव्य मतपेटीत बंद होणार आहे.