उत्तर प्रदेशात सपा-बसपा महाआघाडी तुटण्याच्या मार्गावर?

नवी दिल्ली: पंतप्रधान नरेंद्र मोदी यांचा विजय रथ रोखण्यासाठी उत्तर प्रदेशात निर्माण झालेली सपा-बसपा आघाडी तुटण्याच्या मार्गावर असल्याची माहिती सूत्रांनी दिली. उत्तर प्रदेशात ११ जागांसाठी होणाऱ्या पोटनिवडणुका स्वबळावर लढण्यात येणार असल्याची घोषणा बसपा अध्यक्षा मायावती यांनी केली आहे. त्यामुळे सपा-बसपा महाआघाडी तुटणार असल्याचं बोललं जात आहे. विशेष म्हणजे पोटनिवडणुकांपासून फटकून राहणाऱ्या मायावती यांनी या ११ ही जागा लढवणार असल्याचं घोषित केल्याने आश्चर्य व्यक्त केलं जात आहे.

महाआघाडीची स्थापना करूनही लोकसभा निवडणुकीत फारसं यश हाती न लागल्याने मायावती नाराज आहेत. त्यामुळेच त्यांनी विधानसभांच्या पोटनिवडणुकीत 'एकला चलो रे'ची भूमिका घेतल्याचं बोललं जात आहे. मायावती आज दिल्लीत होत्या. त्यांनी त्यांच्या निवासस्थानी पक्ष कार्यकारिणीची बैठक बोलावून पराभवावर मंथन केलं. महाआघाडीमुळे पक्षाला कोणताही फायदा झाला नाही. यादवांची मतं बसपाला मिळाली नाहीत, असं मायावती यांनी बैठकीत स्पष्ट केल्याचं सूत्रांनी सांगितलं. तसेच उत्तर प्रदेशात होऊ घातलेल्या ११ जागांसाठीच्या पोटनिवडणुका स्वबळावर लढण्याची घोषणाही मायावती यांनी केल्याचं सूत्रांनी सांगितलं. त्यामुळे आगामी काळात महाआघाडी तुटल्याचं बसपाकडून जाहीर होऊ शकतं, असंही सूत्रांच्ं म्हणणं आहे. लोकसभा निवडणुकीत बसपा, सपा आणि आरएलडीची महाआघाडी झाली होती. तिन्ही पक्षांनी ५०हून अधिक जागा जिंकण्याचा दावा केला होता. परंतु, प्रत्यक्षात सपाला ५ आणि बसपाला केवळ १० जागाच जिंकता आल्या. तर भाजपच्या नेतृत्वाखालील एनडीएने ६४ जागा जिंकल्या.