Dimple Yadav : मुलायम सिंहांच्या जागेवर सून मैदानात, अखिलेश यादवांचे एका बाणात पाच निशाणे

लखनौ : ज्येष्ठ नेते मुलायम सिंह यादव यांच्या निधनानंतर रिक्त झालेल्या मैनपुरी लोकसभा मतदारसंघाच्या पोटनिवडणुकीत समाजवादी पक्षाने त्यांच्या सूनबाई अर्थात अखिलेश यादव यांच्या पत्नी डिम्पल यादव यांना तिकीट दिलं आहे. कनौजच्या खासदार राहिलेल्या डिम्पल यांची उमेदवारी जाहीर झाल्याने सर्व उलटसुलट चर्चांना विराम मिळाला आहे.

तेज प्रताप सिंह यादव यांना समाजवादी पक्षाकडून तिकीट मिळण्याची शक्यता वर्तवली जात होती. तेज प्रताप हे यापूर्वीही मैनपुरीतून खासदार होते. तेज प्रताप हे मुलायम सिंह यांचे ज्येष्ठ बंधू रणवीर सिंह यादव यांचे सुपुत्र आहेत. मात्र डिम्पल यादव यांच्या नावावर शिक्कामोर्तब का करण्यात आलं, याची पाच कारणं समोर आली आहेत.

1. राजकीय वारसा - अखिलेश यादव यांना मुलायम सिंह यादव यांचा राजकीय वारसा स्वतःजवळ ठेवायचा आहे. काका, चुलत भाऊ, पुतण्या अशा कोणालाही न देता बायकोलाच तिकीट देत अखिलेश यांनी एक संदेश दिला आहे

२. सुरक्षित जागा - अखिलेश यादव हे पत्नी डिम्पल यांच्यासाठी सुरक्षित मतदारसंघाच्या शोधात होते. कन्नौजमधून पराभवाचा सामना करावा लागल्यानंतर त्या संसदेची पायरी चढू शकल्या नाहीत. त्यांना राज्यसभेवर पाठवण्याच्याही हालचाली सुरु होत्या. १९९६ मध्ये मुलायम सिंह पहिल्यांदा लोकसभेवर गेले. तेव्हापासून यादव कुटुंबातील कुठला ना कुठला सदस्य या मतदारसंघातून विजयी होत आहे.

३. शिवपाल यादव यांना शांत करण्याचा प्रयत्न - मैनपुरी पोटनिवडणुकीत मुलायम सिंह यांचे बंधू आणि प्रगतीशील समाजवादी पक्षाचे नेते शिवपाल यादव उमेदवारी दाखल करण्याची शक्यता होती. मात्र आता चुलत सुनेच्या विरोधात सासरेबुवा शड्डू ठोकण्याची शक्यता कमी आहे.

हेही वाचा : संजय राऊतांना दिल्लीतून बड्या भाजप नेत्याचा फोन

४. चुलत भाऊ-पुतण्यावर कुरघोडी - मैनपुरी पोटनिवडणुकीत मुलायम सिंह यांचे पुतणे तेज प्रताप यादव, धर्मेंद्र यादव यांनाही स्वारस्य होतं. मात्र कुटुंबातील सदस्यालाच तिकीट देऊन अखिलेश यादव यांनी कुरघोडीही केली आणि कौटुंबिक कलहही टाळण्याचा प्रयत्न केला.

५. कार्यकर्त्यांमध्ये लोकप्रिय - २०१९ मध्ये निवडणुकीत पराभव झाल्यानंतरही डिम्पल यादव पक्षाचा प्रचार करत होत्या. त्या कार्यकर्त्यांमध्ये लोकप्रिय आहेत. मुलायमसिंह यांच्या निधनानंतर लोकसभेत यादव कुटुंबातील एकही सदस्य नसल्याने डिम्पल ती जागा भरुन काढतील.

हेही वाचा : सर जडेजाच्या पत्नीला आमदारकीचे तिकिट; विद्यमान आमदाराचा पत्ता कट केला अन् रिवाबाला संधी