यूपीए काळातील व्यवहारांवर लाच घेतल्याचा आरोप
वृत्तसंस्था, नवी दिल्ली
काँग्रेस अध्यक्ष राहुल गांधी यांची बहीण प्रियांका गांधी-वड्रा यांचे पती रॉबर्ट वड्रा यांची सक्तवसुली संचालनालयाने (ईडी) बुधवारी मनी लाँडरिंगप्रकरणी चौकशी केल्यानंतर, भाजपने वड्रा यांच्यासह काँग्रेसला लक्ष्य केले. यूपीए सरकारच्या कालखंडात झालेल्या पेट्रोलियम तसेच संरक्षणविषयक व्यवहारांमध्ये वड्रा यांना लाच मिळाल्याचा आरोप करत भाजपने काँग्रेसवर हल्लाबोल केला.
यूपीए सत्तेत असताना सन २००८-०९ या कालावधीत मिळालेल्या लाचखोरीच्या पैशातून वड्रा यांनी लंडनमध्ये आठ ते नऊ मालमत्ता विकत घेतल्या आहेत, असा आरोप भाजपचे प्रवक्ते संबित पात्रा यांनी बुधवारी नवी दिल्लीत आयोजित पत्रकार परिषदेत केला. 'रोडपती'पासून 'करोडपती' बनण्याचा तुमचा मंत्र काय, असा सवाल वड्रा यांना करताना पात्रा म्हणाले, 'भ्रष्टाचार हा काँग्रेसचा मूळ अजेंडा आहे. या कुटुंबाचा प्रत्येक जण जामिनावर बाहेर आहे. २०१९ची निवडणूक ही भ्रष्टाचारींची टोळी आणि पारदर्शक नरेंद्र मोदी सरकार यांच्यातील संघर्ष आहे.'
वड्रा यांनी आपल्यावरील सर्व आरोप फेटाळले असून आपल्याविरोधात राजकीय सूडबुद्धीने कारवाई करण्यात येत असल्याचे ते म्हणाले. प्रियांका गांधी-वड्रा यांची नुकतीच काँग्रेस पक्षाच्या उत्तर प्रदेशच्या प्रभारी म्हणून नियुक्ती करण्यात आली असून त्यांनी काँग्रेस कार्यालयात बुधवारी हजेरी लावल्याच्या पहिल्याच दिवशी वड्रा यांची ईडीने चौकशी केली.
'निवडणुकीआधी विरोधक लक्ष्य'
कोलकाता : ईडीकडून रॉबर्ट वड्रा यांच्या झालेल्या चौकशीच्या पार्श्वभूमीवर, 'सार्वत्रिक निवडणुकीआधी भाजप विरोधी पक्षांना जाणीवपूर्वक लक्ष्य करत आहे,' असा आरोप पश्चिम बंगालच्या मुख्यमंत्री ममता बॅनर्जी यांनी केला. 'प्रत्येकाला नोटीसा पाठवण्याचे तंत्र वापरून भाजप विरोधी पक्षांना भीती घालू शकणार नाही. या पद्धतीच्या विरोधात आम्ही निवडणूक आयोगाकडे तक्रार करू,' असा इशारा ममता यांनी दिला. पुढील आठवड्यात बुधवार-गुरुवारी आपण दिल्लीला जाणार असून त्यावेळी विरोधी पक्ष पुढील निर्णय घेतील, असे त्या म्हणाल्या.