भाजपच्या महापौरांनी वाजपेयींना 'दिवंगत' केले!

मटा ऑनलाइन वृत्त । आग्रा

'तुम्ही याला अज्ञान म्हणा की आणखी काही. पण भाजपच्या अलीगडच्या महापौर शकुंतला भारती यांनी त्याचं असं काही जाहीर प्रदर्शन केलं आहे की पक्षाची मान शरमेनं खाली गेली आहे. भाजपचे सर्वोच्च नेते व माजी पंतप्रधान अटलबिहारी वाजपेयी यांच्या वाढदिवशीच महापौर भारती यांनी त्यांना 'दिवंगत' म्हटल्याचं समोर आलं आहे.

वाजपेयी यांचा ९२वा वाढदिवस भाजपच्या कार्यकर्त्यांनी काल देशभर जल्लोषात साजरा केला. अलिगडमध्येही यानिमित्त विविध कार्यक्रमांचं आयोजन करण्यात आलं होतं. त्यापैकी एका कार्यक्रमात अलिगडच्या महापौर शकुंतला भारती यांचं भाषण झालं. आपल्या भाषणात त्या म्हणाल्या, 'अटलबिहारी वाजपेयी आज आपल्यात नसले तरी त्यांच्या आठवणी आपल्यासोबत आहेत'. त्यांचं हे वाक्य ऐकून उपस्थित सुन्नच झाले. आपण काय बोलून गेलो आहोत हे त्याक्षणी भारती यांच्या लक्षातही आलं नाही.

कार्यक्रमानंतर पत्रकारांनी त्यांच्या हे निदर्शनास आणलं असता, 'मी पंडित मदनमोहन मालवीय यांच्याविषयी तसं बोलले होते,' अशी सारवासारव त्यांनी केली. मात्र, भाषणाचा व्हिडिओ दाखवताच त्यांचा चेहरा गोरामोरा झाला. 'मी असं कसं बोलून गेले मलाच कळलं नाही. याबद्दल मला अत्यंत दु:ख आहे. मी वाजयपेयींचा आदर करते. त्यांना उदंड आयुष्य लाभावं अशी माझी सदिच्छा आहे,' असं सांगून त्यांनी स्वत:ला सावरून घेतलं.

भारती यांनी आपल्या वक्तव्यावर खुलासा केला खरा, पण तिथं उपस्थित भाजप व अन्य पक्षाच्या नेत्यांना त्यांचं वक्तव्य भलतंच खटकलं. 'अशी वक्तव्य करणं अत्यंत चुकीचं आहे. भारती यांना आपल्या सर्वोच्च नेत्याबद्दल एवढंही ज्ञान नसेल तर त्यांनी भविष्यात जनसमुदायाला संबोधित करणं टाळावं,' अशी नाराजी अलिगड जिल्हा पंचायतीचे माजी सदस्य व बसप नेते नरेंद्र पचौरी यांनी व्यक्त केली.