...जेव्हा उपराष्ट्रपतींची चप्पल चोरीला जाते!

बेंगळुरू: सार्वजनिक कार्यक्रम स्थळावरून किंवा एखाद्या देवळाच्या दारातून चपला चोरीला जाण्याचे प्रकार नवीन नाहीत. पण सुरक्षारक्षकांचा पहारा असताना एखाद्या खासदाराच्या घराबाहेरून चपला चोरीला जाण्याची घटना विरळच! शिवाय, हा प्रकार कुणा सामान्य माणसासोबत घडला नसून देशाचे उपराष्ट्रपती व्यंकय्या नायडू यांच्याबाबत घडला आहे. या प्रकारामुळं आश्चर्य व्यक्त होत आहे.

उपराष्ट्रपती व्यंकय्या नायडू हे शुक्रवारी भाजप खासदार पी. सी. मोहन यांच्या घरी नाश्ता करण्यासाठी गेले होते. त्यांनी घरात जाण्याआधी आपल्या पायातील चप्पल घराबाहेर ठेवली. नाश्ता करून घराबाहेर पडल्यानंतर त्यांना त्यांची चप्पल ठेवलेल्या जागी दिसली नाही. कर्मचारी आणि सुरक्षा रक्षकांनी हरवलेली चप्पल खूप शोधली. परंतु, ती शेवटपर्यंत मिळाली नाही. ती कोणीतरी लांबवली याचा अंदाज आल्यानंतर एका कर्मचाऱ्यांनं शेवटी बाजूच्या शोरूममध्ये जाऊन नायडू यांच्यासाठी नवी चप्पल आणली व सर्वांनीच सुटकेचा निःश्वास सोडला. मात्र, नायडूंची चप्पल नेमकी कोणी लांबवली, याचा उलगडा होऊ शकलेला नाही.