जवानांना म्हणा 'थँक यू', गंभीरची भावनिक साद

मटा ऑनलाइन वृत्त । नवी दिल्ली

तुम्हाला कधीही लष्कराच्या वर्दीतील व्यक्ती दिसली, देशासाठी लढणारा जवान दिसला तर त्याला एक सॅल्यूट कराच, असं आवाहन बॉलिवूड अभिनेता अक्षय कुमारनं अलीकडेच केलं होतं. तशीच, देशाच्या जवानांना थँक यू म्हणण्याची साद भारताचा क्रिकेटवीर गौतम गंभीरनं घातली आहे.

'झिझक की पट्टी' या मोहिमेअंतर्गत गौतम गंभीरनं आपला एक व्हिडिओ ट्विटरवरून शेअर केलाय. भारताच्या खऱ्या हिरोंशी हस्तांदोलन करा, त्यांना थँक यू म्हणा आणि त्यांच्यासोबत सेल्फी काढून #SoldierSelfies या हॅशटॅगसह पोस्ट करा, असं आवाहन त्यानं केलं आहे.

जवानांवर झालेले हल्ले, त्यांना काश्मीरमध्ये झालेली मारहाण, त्यांचं हौतात्म याबाबत गौतम गंभीरनं अलीकडच्या काळात आपली रोखठोक मतं मांडली आहेत. जवानांना मारलेल्या एकेका थपडेला प्रत्युत्तर म्हणून शंभर-शंभर दहशतवाद्यांना ठार मारलं पाहिजे, अशी तीव्र प्रतिक्रिया त्यानं व्यक्त केली होती. तसंच, सुकमा नक्षलवादी हल्ल्यात शहीद झालेल्या २५ जवानांच्या मुलांच्या शिक्षणाचा संपूर्ण खर्च गंभीरनं उचलला आहे. आता ही मोहीम त्याला आणखी पुढे घेऊन जायचीय.

I have stepped out of my crease. Will you? @FeverFMOfficial @majorgauravarya @narendramodi @PMOIndia #BharatPositive pic.twitter.com/h8WZSJqCgx — Gautam Gambhir (@GautamGambhir) May 29, 2017