जवानाला मारहाण

वृत्तसंस्था, श्रीनगर

श्रीनगरमध्ये रविवारी झालेल्या पोटनिवडणुकीनंतर ईव्हीएम मशिन घेऊन जाणाऱ्या सीआरपाफच्या जवानावर संतप्त जमावाने केलेल्या हल्ल्याचा व्हिडीओ सोशल मीडियावर व्हायरल झाला आहे. या व्हिडीओतील जवानाच्या प्रतिक्रियेनंतर त्यांच्याबद्दलचा आदर द्विगुणित झाल्याशिवाय राहत नाही.

सीआरपीएफचे काही जवान संतपालेल्या आंदोलकांमधून वाट काढत असताना या व्हिडीओमध्ये दिसत आहेत. मध्येच एक तरुण एका जवानाला लाथ मारतो, या जवानाच्या हातात रायफल आहे, मात्र तो कोणताही विरोध न करता मान खाली घालून शांतपणे चालत राहतो. थोड्या अंतरावर गेल्यावर अन्य एक तरुण याच जवानाच्या डोक्यावर जोरात मारतो. त्यालाही तो जवान प्रत्युत्तर न देता शांतपणे निघून जातो. जवानांना चिथविण्याचा प्रयत्न फोल ठरल्यावर हे आंदोलक तरुण सरकारविरोधात घोषणा देत पुढे निघून जातात.

या व्हिडीओबाबत त्या जवानाला विचारले असता तो म्हणाला, जमाव संतापलेला होता. त्यांनी आम्हाला चिथवण्यासाठी मारहाण करण्याचा प्रयत्न केला. परंतु आमच्याजवळ असलेली ईव्हीएम मशिन्स सुरक्षितस्थळी पोहोचविणे हे आमचे प्रथम कर्तव्य होते. त्यामुळे मी आणि माझ्या सहकाऱ्यांनी त्यांचा प्रतिकार केला नाही.
हा व्हिडीओ प्रसिद्ध झाल्यापासून सोशल मीडियावर या जवानाच्या प्रतिक्रियेवर चर्चा रंगू लागली आहे. काश्मीरच्या तरुणांच्या कृतीबद्दल संताप व्यक्त होत असतानाच या जवानाच्या वर्तनाचे कौतुक केले जाते आहे.