वृत्तसंस्था, भोपाळ
पार्किंगमध्ये लावलेल्या वाहनांची पोलिस स्वत:च तोडफोड करत असल्याचा व्हिडीओ सोशल मीडयातून समोर आला आहे. मध्य प्रदेशमधील जबलपूर येथील ही घटना असून या ठिकाणी नागरिकत्व दुरुस्ती कायद्याविरोधात हिंसात्मक निदर्शने झाली होती. या व्हिडीओची सत्यता तपासली जाईल, असे जबलपूर पोलिसांनी गुरुवारी स्पष्ट केले.
निदर्शकांना धडा शिकवण्यासाठी पोलिसांनी ही शक्कल लढवल्याचे बोलले जाते. काही जणांनी ही घटना उत्तर प्रदेशमधील असल्याचे म्हटले होते. मात्र, उत्तर प्रदेश पोलिसांनी या घटनेशी त्यांचा काहीही संबंध नसून तो मध्य प्रदेशातील जबलपूरचाच असल्याचे ट्विटरवर स्पष्ट केले आहे. हे चित्रिकरण एका घरामधून करण्यात आले असून इमारतीबाहेर लावलेल्या गाड्यांची खिडक्यांची तावदाने पोलिस काठीने फोडताना दिसत आहेत. मात्र, यातून ही घटना कधी घडली ते मात्र ध्यानात येत नाही.
उत्तर पोलिसांच्या दाव्यावर आश्चर्य व्यक्त करीत जबलपूरचे पोलिस अधीक्षक अमित सिंग यांनी,
'आम्ही या व्हिडीओमध्ये काही छेडछाड केली आहे का ते तपासू. मात्र, आत्तापर्यंत आमच्याकडे याबाबत कोणतीही तक्रार दाखल झालेली नाही,' असे सांगितले. या व्हिडीओमध्ये डॉक्टरांच्या क्लिनिकचे नाव, पत्ता आणि फोन नंबर असलेले जाहिरातीचे होर्डिंग दिसते. मात्र, यात दाखवलेल्या नंबरवर फोन केला असता काहीही प्रतिसाद मिळाला नाही. घटनेबद्दल माहिती करून घेतल्यानंतरच आपण याविषयी अधिक प्रतिक्रिया देऊ, असे मध्य प्रदेशचे गृहमंत्री बाला बच्चन यांनी सांगितले.
२० डिसेंबर रोजी जबलपूरच्या गोहालपूर, हनुमंताल, कोतवाली आणि आधारताल भागात दगडफेक आणि पोलिसांसोबत झालेल्या झटापटीच्या घटनांनंतर संचारबंदी लागू करण्यात आली होती.