भारतीय लष्कर युद्धसज्ज?

डोकलामजवळील गाव रिकामे करण्याचे आदेश
​
वृत्तसंस्था, नवी दिल्ली

डोकलाम संघर्षाच्या पार्श्वभूमीवर येथून जवळ असलेले नथांग हे गाव रिकामे करण्याचे आदेश भारतीय लष्कराने गावक‍ऱ्यांना दिले आहेत. चिनी सैन्याशी चकमक झाल्यास सावधगिरी म्हणून हे पाऊल उचलण्यात आले आहे की, डोकलामकडे निघालेल्या हजारो जवानांची निवासव्यवस्था करण्यासाठी, हे मात्र स्पष्ट झालेले नाही. त्यामुळे तर्कवितर्कांना उधाण आले आहे.

डोकलाममध्ये गेल्या दोन महिन्यांपासून जिथे भारतीय जवान आणि चिनी सैनिक एकमेकांसमोर उभे ठाकले आहेत, तिथून ३५ किमी अंतरावर असलेल्या नथांग गावामध्ये शेकडो गावकरी राहतात. त्यांनी तातडीने हे गाव सोडून जावे, असे आदेश भारतीय लष्कराने दिले असल्याचे सूत्रांनी सांगितले. डोकलाममध्ये दोन्ही देशांनी युद्धसज्जता केली असून भारतीय लष्कराच्या ३३ कॉर्प रेजिमेंटचे हजारो जवान सुकना येथून डोकलामच्या दिशेने रवाना झाले आहेत. या जवानांची राहण्याची व्यवस्था करण्यासाठी नथांग गाव रिकामे केले जात आहे की, चिनी सैन्याशी चकमक झाल्यास सावधगिरी म्हणून हे पाऊल उचलण्यात आले आहे, हे स्पष्ट होऊ शकलेले नाही.

भूतानची चीनला चपराक

सिक्कीममधील डोकलाम येथील भूभाग आपला नसल्याचे भूतानने जाहीर केले आहे, असा दावा चीनच्या परराष्ट्र मंत्रालयाने बुधवारी चीनच्या दौ‍ऱ्यावर गेलेल्या भारतीय पत्रकारांच्या चमूसमोर केला होता. हा दावा भूतानने गुरुवारी फेटाळून लावला. भूतानच्या परराष्ट्र मंत्रालयातील अधिका‍ऱ्यांनी वृत्तसंस्थेशी बोलताना सांगितले की, चीनने भूतानच्या भूभागात रस्त्याचे काम सुरू करणे हे उभय देशांमधील कराराचे थेट उल्लंघन असल्याचे भूतानने २९ जून २०१७ रोजीच मंत्रालयाच्या अधिकृत वेबसाइटवर जाहीर केले होते. त्यामुळे तो भूभाग आमचा नाही हे जाहीर करण्याचा प्रश्नच येत नाही.