एक बातमी वणव्यासारखी पसरली; अख्खं गाव नदी किनाऱ्यावर लोटला, शोधकाम सुरू; काय सापडलं?

कोलकाता: नदी पात्राजवळ सोनं सापडत असल्याची बातमी पसरल्यामुळे ग्रामस्थांनी एकच गर्दी केली. पश्चिम बंगालच्या बिरभूम जिल्ह्यातून बांसलोई नदी वाहते. या नदीच्या पात्राजवळ काही ग्रामस्थांना सोन्याचे तुकडे सापडले. ही बातमी गावात वाऱ्यासारखी पसरली. त्यानंतर ग्रामस्थांनी सोनं गोळा जमा करण्यासाठी तोबा गर्दी केली. ग्रामस्थ नदीच्या किनाऱ्यावर येऊन सोन्यासाठी शोधाशोध करत आहेत.

एका स्थानिकानं दिलेल्या माहितीनुसार, नदी किनाऱ्यावरील मातीमध्ये थोडंसं खोदकाम केल्यानंतर सोनं सापडलं. मात्र सोन्याचं प्रमाण अतिशय कमी होतं. सापडलेलं सोनं जुन्या काळातील चलनांप्रमाणे दिसत होतं. त्यावर काही प्राचीन अक्षरं आहेत. नदीकिनारी सोनं सापडल्याची बातमी गावात वणव्यासारखी पसरली आणि ग्रामस्थांची गर्दी जमली. सगळ्यांनी नदीपात्राजवळ शोधकाम सुरू केलं.
लग्नाच्या १० दिवसांनंतर नवरा-नवरीचं अपहरण; दिवसाढवळ्या घरातून पळवलं; कारण समोर
नदीत सापडलेला धातू सोनं असून तो हिंदू राजांच्या खजिन्याचा भाग आहे. हिंदू राजांच्या काळातला खजिना नदीच्या प्रवाहात बुडाला होता, असं एका स्थानिकानं सांगितलं. स्थानिक आदिवासी मजूर परिसरात सोन्याचा शोध घेत आहेत. सोन्याचं भांडार हाती लागेल या हेतूनं आसपासचे ग्रामस्थ तीन दिवसांपासून नदीपात्राजवळ शोधाशोध करत आहेत. बिरभूम जिल्हा प्रशासन आणि भारतीय पुरातत्त्व विभागाला याची माहिती देण्यात आली आहे.
रेल्वे प्लॅटफॉर्मवरील टीव्हीवर पॉर्न क्लीप, नेमकं काय घडलं? तपासातून आश्चर्यकारक माहिती उघड
सोन्याचे तुकडे सापडतील या आशेनं ग्रामस्थ नदीकिनारी जमले आहेत. सोन्याच्या नाण्यांप्रमाणे दिसणाऱ्या अनेक वर्तुळाकार वस्तू काही ग्रामस्थांना सापडल्या आहेत. सोन्याची नाणी झारखंडला लागून असलेल्या महेशपूर राजबाडीची असल्याचं स्थानिकांना वाटतं. राजबाडी किंवा कूचबिहार पॅलेसला ऐतिहासिक महत्त्व आहे. राजबाडीची उभारणी १८८७ मध्ये महाराजा नरेंद्र नारायण यांच्या शासनकाळात झाली. याचं डिझाईन बकिंगहम पॅलेसच्या धर्तीवर करण्यात आलं आहे.


सोन्याची नाणी राजबाडीवरून सुवर्णरेखा नदीच्या माध्यमातून बांसलाई नदीत वाहत आल्याचा ग्रामस्थांचा कयास आहे. झारखंडमधील एकाला बांसलाई नदीत सोन्याचा हार सापडला होता, असाही दावा काहींनी केला. घटनेची माहिती मिळताच प्रशासनानं हालचाली सुरू केल्या. ब्लॉक विकास अधिकारी जागृत चौधरींनी घटनेची माहिती मुरारई पोलीस ठाण्याला दिली. या ठिकाणी अनुचित प्रकार घडू नये म्हणून नदीजवळ एक पोलीस अधिकारी तैनात करण्यात आला आहे.