कॉलेजच्या मुलींचीही जवानांवर दगडफेक

मटा ऑनलाइन वृत्त । श्रीनगर

काश्मिरी तरुण सीआरपीएफच्या जवानांना लाथा, थपडा मारत असल्याचा संतापजनक व्हिडिओ आपण सगळ्यांनीच पाहिलाय. हे तरुण जवानांवर दगडफेक करत असल्याचे फोटोही नेहमीच दिसतात. पण, काश्मीरमधील शालेय मुलींनीही लष्करी जवानांवर दगड फेकल्याचा खळबळजनक प्रकार सोमवारी घडला. या आंदोलनानंतर काश्मीरमधील शाळा-महाविद्यालयं पुन्हा बंद करण्याचा निर्णय प्रशासनानं घेतला आहे.

जम्मू-काश्मीरच्या मुख्यमंत्री मेहबुबा मुफ्ती यांनी सोमवारी पंतप्रधान नरेंद्र मोदींची भेट घेतली. काश्मीर खोऱ्यात शांतता प्रस्थापित करण्याबाबत ते चर्चा करत असतानाच इकडे श्रीनगर पेटलं होतं. पुलवामामध्ये पीडीपी नेते अब्दुली गनी डार यांची संशयित दहशतवाद्यांनी गोळ्या झाडून हत्या केल्यानं तणाव निर्माण झाला, तर दुसरीकडे पुलवामा डिग्री कॉलेजमधील पोलीस कारवाईच्या निषेधार्थ विद्यार्थी रस्त्यावर उतरले. १५ एप्रिलला पुलवामा महाविद्यालयात पोलीस आणि विद्यार्थ्यांमध्ये हाणामारी झाली होती. सुमारे ५० जण जखमी झाले होते. त्याचे पडसाद श्रीनगर आणि आजूबाजूच्या शाळांमध्ये उमटत असतानाच, सोमवारी एसपी उच्च माध्यमिक शाळेचे शेकडो विद्यार्थ्यांनी वर्गाबाहेर येऊन शाळेचं प्रवेशद्वार तोडून टाकलं आणि 'रास्ता रोको'ही केला. वुमन्स कॉलेजमधील मुलीही रस्त्यावर उतरून दगड फेकत होत्या. पोलिसांनी त्यांना पांगवण्याचा प्रयत्न केला, तेव्हा रागाच्या भरात विद्यार्थ्यांनी जवानांवर दगडफेक केली. त्यामुळे पोलिसांना विद्यार्थ्यांवर अश्रुधूर आणि पाण्याचे फवारे मारावे लागले.



पाकिस्तानी झेंडे फडकवत विद्यार्थी घोषणाबाजी करत होते. त्याचवेळी अनेकांनी दगडफेकही केली. त्यामुळे पोलिसांच्या गाड्यांच्या काचा फुटल्या आणि १२ पोलीस कर्मचारी जखमीही झाले. काही विघ्नसंतोषी लोकांनी या विद्यार्थ्यांना शाळेत शिरून चिथावणी दिल्याचं पोलिसांचं म्हणणं आहे. या प्रकरणी पोलिसांनी सहा विद्यार्थ्यांना ताब्यात घेतलं आहे.