रंगेल शिक्षकाचे 'ते' फोटो व्हायरल

मटा ऑनलाइन वृत्त । नवी दिल्ली

आसाममधील एका शिक्षकाने गुरु-शिष्य यांच्यातील पवित्र नात्याला काळीमा फासणारं कृत्य केलं असून या शिक्षकाने विद्यार्थिनींसोबत आक्षेपार्ह अवस्थेतील फोटो फेसबुकवर पोस्ट केल्याने सर्वत्र संताप व्यक्त होऊ लागला आहे. या शिक्षकाविरोधात संबंधित विद्यार्थ्यांच्या पालकांनी पोलीस ठाण्यात तक्रार करूनही अद्याप या शिक्षकाला अटक करण्यात आलेली नाही.

आसाममधील हेलाकांडी जिल्ह्यात काटलीचेरा गावात हा बिभत्स प्रकार घडला आहे. DY-365 या स्थानिक चॅनेलने याबाबत वृत्त दिले आहे. फैजुद्दीन लश्कर असे या शिक्षकाचे नाव आहे. त्याने सर्व मर्यादा ओलांडत शाळेतील विद्यार्थिनींसोबत आक्षेपार्ह फोटोशूट केलं. त्यानंतर हे फोटो त्याने फेसबुकवर पोस्ट केल्याने मोठी खळबळ उडाली. या विद्यार्थ्यांच्या पालकांनी पोलिसांकडे तक्रार दाखल केली मात्र पोलिसांनी केवळ चौकशी करून फैजुद्दीनला मोकाट सोडले. त्यामुळे गावात तणावाचे वातावरण आहे. वरिष्ठ पोलीस अधिकारी मोनिरुल इस्लाम या शिक्षकाला पाठिशी घालत आहे, असा आरोप लोकांकडून होत आहे.

या शिक्षकाने विद्यार्थिनींना कोणतं आमिष दाखवून हे फोटोशूट केलं, याबाबत अद्याप कोणतीही माहिती मिळू शकलेली नाही. स्थानिक चॅनेलच्या वृत्तानुसार, या शिक्षकावर यापूर्वी एका महिलेचं लैंगिक शोषण केल्याचा आरोपही झाला होता. त्यावेळी संतप्त जमावाने त्याला बेदम मारहाण केली होती. त्याचं बोटही कापण्यात आलं होतं.