विवेकानंदांच्या घराला मिळणार जुना हेरिटेज लुक?

मटा ऑनलाइन वृत्त । कोलकाता

रामकृष्ण मिशनच्या इच्छेला कोलकाता राज्य सरकारने हिरवा कंदिल दाखवला तर स्वामी विवेकानंदांच्या घराला जुना हेरिटेज लुक मिळू शकतो. ​ विवेकानंदांच्या जयंतीदिनी त्यांचे हजारो अनुयायी या वास्तूत जमतात आणि वेदमंत्रांचे पठण करतात.

२००४ मध्ये विवेकानंदांच्या पिढीजात मालमत्तेतल्या वास्तूचे नुतनीकरण करण्यात आले. यासाठी २५ कोटी रुपये खर्च करण्यात आले. येथे एक संग्रहालय, एक संशोधन केंद्र, एक स्मारक, एक ग्रंथालय, भाषांची शाळा, संगणक प्रशिक्षण केंद्र आणि धर्मादाय आरोग्य केंद्र सुरु करण्यात आले. इमारतीसमोर विवेकानंदांचा भव्य पुतळा उभारण्यात आला. २०१३ मध्ये मुख्यमंत्री ममता बॅनर्जी यांनी संस्थेला येथील आणखी एक जागा स्वामींच्या स्मारकाकरिता हस्तांतरित करून दिली.

'आम्ही कोलकाता उच्च न्यायालयाच्या जुन्या दस्तावेजातून स्वामींच्या कौटुंबिक मालमत्तेचे विवरण पाहिले. आम्ही या मालमत्तेच्या हस्तांतरणासाठी सरकारकडे निवेदन देणार आहोत,' असे रामकृष्ण मिशनचे सचिव स्वामी पूर्णात्मानंद म्हणाले. आता जिथे जनरल पोस्ट ऑफिस आहे तिथे विवेकानंदांचे पूर्वज राहात होते, हे फार कमी जणांना ठाऊक आहे. मिशनच्या इच्छेनुसार सरकारने ही संपूर्ण मालमत्ता हस्तांतरित केली तर विवेकानंदांच्या या घराला तीच जुनी ओळख पुन्हा मिळू शकते.